Экс-полицейскай суут быһаарыытынан баайын-дуолун былдьатта

Саха Өрөспүүбүлүкэтин Үрдүкү суута полиция урукку начаалынньыгыттан уонна кини кэргэниттэн 11,9 мөл. солк. судаарыстыба суотугар ирдиир туһунан Ленскэй оройуонун суутун быһаарыытын күүһүгэр хаалларда.

Иркутскай уонна Воронеж куораттарга баар кыбартыыралары, Ленскэйгэ үс сир учаастагын уонна икки массыынаны атыылаһыы туһунан дуогабардар күүстэрэ суоҕунан ааҕылыннылар. Борокуратуура быһаарбытынан, кэргэнниилэр 2020-2022 сыллардааҕы дохуоттарын туһунан ыспыраапкаларыгар дьиэ кэргэн уопсай  үптэриттэн-харчыларыттан быдан үрдүк суумалаах дохуоттарын ыйбатахтар. Ону таһынан, декларацияларыгар дохуоттарын көрдөрүүлэрин үрдэтэн суруйбуттар.

Урукку полицейскай бу харчы хантан киирбитин быһааран биэрбэтэх. Ол түмүгэр, кинини кытта хантараак тохтотуллубут уонна бэйэтэ «итэҕэли сүтэрбитинэн» үлэтиттэн ууратыллыбыт. Ленскэй оройуонун суутун быһаарыыта сокуоннай күүһүгэр киирдэ, — диэн Саха Өрөспүүбүлүкэтин Үрдүкү суутун пресс-сулууспата иһитиннэрэр.