Эксээмэн бэрээдэгин кэһэн туран сэртипикээт биэрбиттэр

“Суруйбут сурукпут сойо да илигинэ” диэбиккэ дылы, тас дойду дьонуттан эксээмэни тутууга кэһиллии Саха сиригэр тахсыбыта билиннэ.

Тас дойду олохтооҕо Арассыыйаҕа быстах кэмҥэ олохсуйаары нуучча тылын, Арассыыйа устуоруйатын уонна суутун-сокуонун төрүттэрин билэрин туһунан эксээмэн туттарбыт.

“Дьокуускай куорат борокуратуурата ыыппыт бэрэбиэркэтин кэмигэр эксээмэн хаамыыта кэһиллиилээх барбыта, ол иһигэр, атын дьон этэн биэрбиттэрэ, кандидат билиитэ ирдэнэр таһымҥа сөп түбэспэтэ быһаарылынна.

Дьокуускай куорат борокуруорун ирдэбилинэн туһааннаах сэритипикээт дьиҥэ суоҕунан ааҕылынна.

Суут быһаарыыта күүһүгэр киирэ илик”, — диэн Борокуратуура пресс-сулууспата иһитиннэрэр.

Санатан эттэххэ, ити курдук түгэннэр Арассыыйаҕа баалларын, кэккэ университеттарга сэрэтии бэриллибитин туһунан бэҕэһээ саайтпытыгар суруйан турабыт. Бу ыйыллыбыт сигэнэн киирэн ааҕыаххытын сөп.