Элбэх оҕолоох ийэ Мария Адамова «Преображение» куонкурус кыайыылааҕынан буолла

Элбэх оҕолоох 35 саастаах Мария Адамова «Преображение» социальнай бырайыак кыайыылааҕынан буолла. Үс ый иһигэр ыал ийэтэ уопсайа 21 кг ыһаайынын түһэрдэ.

Куонкурус кыттыылаахтара марафон кэмигэр успуордунан дьарыктаммыттара, психологтар консультацияларыгар сылдьыбыттара уонна сөпкө аһыырга үөрэммиттэрэ.

«Мин хамсаабат баай-дуол агенынан үлэлиибин, кэргэммин кытта түөрт оҕолоохпут. Куонкуруска кыттарбар аан бастаан 95 кг ыйааһыннааҕым. Бастаан утаа олус ыарахан этэ, бырайыактан барар туһунан санаалар кытта киирбиттэрэ. Кэргэним, тириэньэрим, диетологым, психологым өйөбүллэринэн салгыы кыттарга быһаарыы ылыммытым. Бырайыак олус туһалаата — бэйэбин олус дьоллоох, доруобай курдук сананабын. Миэхэ цифровой уонна олох-дьаһах тиэхиньикэтин атыылаһарга 35 тыһыынча солкуобайдаах сэртипикээт туттардылар», — диэн Мария Адамова СИА-ҕа кэпсээтэ.

Куонкурус финалыгар 12 элбэх оҕолоох ийэ тахсыбыта. «Преображения» сүрүн координаторынан Доруобуйа харыстабылын министиэристибэтэ буолар, бырайыак Успуорт министиэристибэтин уонна атын биэдэмистибэлэри кытта олоххо киирэр. Дьахталлар мэдиссинэ чинчийиилэрин, диетолог-быраас көрүүлэрин, сөпкө аһааһын марафонун аастылар.

«Бары кыттааччылар олус дьоллоохтор. Дьахталлар чөл олоҕу тутуһарга, сөптөөхтүк аһыырга үөрэннилэр, — диэн өрөспүүбүлүкэтээҕи уопсастыбаннай доруобуйа уонна мэдиссиинэ профилактикатын киинин кылаабынай бырааһа Юлия Спиридонова кэпсээтэ.