Элбэх оҕолоох Никаноровтар «Эдэр ыал» Арассыыйатааҕы күрэскэ кыайдылар

Горнай улууһун Маҕарас нэһилиэгин элбэх оҕолоох ыала — Никаноровтар Бүтүн Арассыыйатааҕы «Сыл дьиэ кэргэнэ-2025» күрэскэ «Эдэр ыал» номинация кыайыылаахтарынан буоллулар. Бу туһунан Ил Дархан Айсен Николаев телеграм-ханаалыгар суруйда.

«Айтал уонна Саргылаана Никаноровтар — аҕыс оҕо төрөппүттэрэ. Никаноровтар-Афанасьевтар педагогическай династия бэрэстэбиитэллэрэ буолаллар уонна үөрэхтээһиҥҥэ үлэлээн, бэйэлэрин холобурдарынан оҕолорго педагог идэтин суолтатын көрдөрөллөр.

Никаноровтар бэйэ-бэйэҕэ истиҥ сыһыаны сыаналыыллар, дьиэ кэргэн үгэстэрин харыстыыллар. Кыайыыларынан эҕэрдэлиибин!» — диэн Ил Дархан суруйда.