«Өлбөт үйэлээх полк» икки көрүҥүнэн ыытыллыаҕа

Быйыл ыам ыйын 9 күнүгэр «Өлбөт үйэлээх полк» икки көрүҥүнэн ыытыллыаҕа. Эһэлэрин-эбэлэрин мэтириэттэрин туппут дьон сэлэлээн хаамыахтара уонна онлайн көрүҥүнэн эмиэ ыытыллыаҕа. Бу туһунан «Арассыыйа Өлбөт үйэлээх полката» Бүтүн Арассыыйатааҕы уопсастыбаннай хамсааһын киин ыстаабын хос бэрэссэдээтэлэ Елена Цунаева иһитиннэрдэ.

— Кыайыы 80 сылыгар, 2025 сыл ыам ыйын 9 күнүгэр «Өлбөт үйэлээх полк» дойду үрдүнэн икки көрүҥүнэн ыытыллыаҕа. Биһиги эрэгийиэннээҕи салааларбыт олохтоох былааһы кытта сүбэлэһэн баран, сэлэлээн хаамар кыах баар диэн быһаарыныы ылыннахтарына, Кыайыы күнүгэр «Өлбөт үйэлээх полк» куораттар уулуссаларын, болуоссаттарын киэргэтиэҕэ. Оттон онлайн көрүҥүнэн ыытыллара эмиэ наадалаах, — диэн кини кэпсээтэ.

Эрэгийиэннэргэ сэлэлээн хаамыы биир эрэ күн — ыам ыйын 9 күнүгэр ыытыллар. Оттон хастан буоларын эрэгийиэннээҕи былаас уорганнара бэйэлэрэ быһаараллар, тоҕо диэтэр, чааһынан арахсыы улахан.

Илин диэкиттэн саҕаланан баран, «Өлбөт үйэлээх полк» дойду устун сэлэлии хааман, Улуу Кыайыыны уһансыбыт, Ийэ дойдуларын көмүскээбит ытык дьоммутугар сүгүрүйүү бэлиэтэ буолуоҕа.