Электроннай бэбиэскэ туһунан уураах үлэлээтэ

Бу сылга бастакы электроннай бэбиэскэлэри аны күһүн ыҥырыллар гражданнарга туттараллара күүтүллэр.

Муус устар 28 күнүттэн үлэлээбит дойду Бырабыыталыстыбатын уурааҕынан байыаннай учуот икки түһүмэҕинэн электроннай көрүҥҥэ көһүөҕэ, оттон бэбиэскэ «Госуслуги» портал нөҥүө ыытыллар буолуоҕа. Бу сыл муус устар 19 күнүгэр 506№-дээх ылыныллыбыт Бырабыыталыстыба уурааҕа  «О государственной информационной системе «Единый реестр сведений о гражданах, подлежащих первоначальной постановке на воинский учет, гражданах, состоящих на воинском учете, а также о гражданах, не состоящих, но обязанных состоять на воинском учете» муус устар 27 күнүттэн үлэлээтэ. Уурааҕы бу сигэнэн киирэн көрүөххэ сөп. Бу туһунан Лента.ру суруйар.

Докумуонунан киирэр электроннай испииһэктэри (реестри) тэрийиигэ сүрүн уларыйыыларынан буолаллар:

— 2024 с. алтынньы 31-гэр диэри күүһүгэр киириэҕиттэн байыаннай учуот биир кэлим испииһэгин тэрийии уонна үлэҕэ киллэрии;

— 2024 с. сэтинньи 1 күнүттэн электроннай испииһэги үлэлэтии уонна электроннай бэбиэскэ испииһэгин үлэлэтии.

Саҥа тиһик онлайн эриһииминэн  байыаннай эбээһинэстээх гражданнар испииһэгин военкоматтар уонна биирдиилээн дьон көрөр кыахтаналлар. Электроннай бэбиэскэ испииһэккэ тахсаатын 7 хонук ааспытын кэннэ, бэбиэскэ гражданнарга чахчы туттарыллыбытынан ааҕыллар. Маны сэргэ, үлэ биэрээччилэр онлайн эрэһииминэн байыаннай сулууспалаахтар уонна байыаннай учуот сибидиэнньэлэрин саҥардан биэриэхтэрин сөп буолуоҕа. Реестиргэ киирэр дааннайдары араас судаарыстыбаннай ресурсалартан, ол иһигэр «Госуслуги» порталтан ылыахтара.

Электроннай бэбиэскэ испииһэккэ 7 хонук тахсыбытын кэннэ, байыаннай сулууспаҕа ыҥырыллыбыт гражданнарга тас дойдуга тахсыыга бобуу олохтонор. Ол курдук, рееестринэн бэбиэскэ ыытыллыбыт гражданнар тас дойдуларга тахсар кыахтара тохтотуллар. Маны таһынан тас дойдуга тахсар пааспары оҥорууга кыаллыбат буолар. Ону кытта, тырааныспары ыытыыга бобуу олохтонор, тырааныспары атыылааһыҥҥа бобуу киирэр, урбаанынан дьарыктанарга регистрациялыыр кыаҕын сүтэрэр, ону кытта кирэдьиит  эбэтэр займ ылар кыаҕын сүтэрэр.

Бу кэмтэн ыла военкоматтар уонна кыраныысса сулууспатын икки ардыларыгар хардарыта бииргэ үлэлээһиннэрэ онлайн эрэһииминэн күүһүрэн биэриэҕэ. Итинэн сибээстээн, дойду иһигэр киирии, таһыгар тахсыы туһунан сибидиэнньэлэр күн ахсын суруллуохтара.