Өлүөхүмэҕэ оҕолордоох эһэни өлөрбүттэрэ кырдьык дуо?

Аҕыйах хонуктааҕыта Үҥкүр уонна Өлүөхүмэ куорат икки ардынан суол кытыытынан оҕолордоох эһэ сылдьар, сэрэхтээх буолуҥ диэн Өлүөхүмэ улууһун дьаһалтатын телеграм-ханаала иһитиннэрбитин туһунан суруйбуппут.

Аны бэҕэһээ оҕолордоох эһэни өлөрбүттэрин туһунан видео социальнай ситимнэргэ тарҕанан үгүс киһини дьиксиннэрдэ, соһутта.

Бу быһылаан туһунан СИА-ҕа Өлүөхүмэ улууһун айылҕа харыстабылын кэмитиэтин салайааччы Виктор Филиппов маннык иһитиннэрбит:

— Биһиги нэһилиэнньэҕэ оҕолордоох эһэ баарын туһунан тута иһитиннэрбиппит. Кинилэри Үҥкүр уонна Өлүөхүмэ куорат икки ардыгар сылдьалларын көрбүттэр. Бу эһэлэри өлөрбүттэрин туһунан информация чопчуланар. Бэнидиэнньиккэ (бүгүн, эрэд.) биллэриэхпит. Нэһилиэнньэлээх пууннарга кутталы суоһаабаттар диэн, кыыллары өлөрүүгэ лицензия бэриллибэтэҕэ.