Өрөспүүбүлүкэ болуоссатыгар кадеттарга аналлаах “Бүтэһик чуораан” чугдаарда

Бүгүн Өрөспүүбүлүкэ болуоссатыгар Дьокуускай куораттааҕы кадетскай оскуоланы бүтэрээччилэргэ “Бүтэһик чуораан” тэрээһин буолла. Быйыл 11-с кылааһы барыта 20 оҕо бүтэрэр.

Үөрэх уонна билим миниистирин солбуйааччы Степан Степанов быйыл Саха сиригэр 9-с кылааһы 15 тыһ. тахса, 11-с кылааһы 8 тыһ. тахса оҕо бүтэрэрин иһитиннэрдэ, кадеттарга бэлиэ күнүнэн эҕэрдэтин тириэртэ. “Киһи олоҕор оҕо төрөөһүнэ, ыал буолуу, бастакы хамнас, бастакы үлэ, үрдүк уонна орто үөрэҕи бүтэрии курдук түгэннэр бааллар. Бүгүн эмиэ ол курдук суолталаах күн. Аны чуораан тыаһынан уруокка сүүрбэккит. Биир өртүнэн үөрүүлээх, иккис курдук хомолтолоох.

Эһигини олох киэҥ аартыгар бэлиэ түгэннэр, чаҕылхай олох күүтэр. Ситиһиини, дьолу баҕарабын!” – диэн оскуоланы бүтэрээччилэргэ баҕа санаатын эттэ. Итиэннэ дойду дьоһуннаах ыччатын иитиигэ сыраларын, патриотическай тэрээһиннэргэ көхтөөх кыттыыларын иһин төрөппүттэргэ министиэристибэ аатыттан махтал суруктары туттарда.

Кадетскай оскуола дириэктэрэ Алексей Корякин: “Саха сирин кадеттарын туһунан билигин Арассыыйа барыта билэр. Онон махталбын биллэрэбин. Кытаанах доруобуйаны, ситиһиини, олоххут саҥа саҕалааһыннарыгар барытыгар табыллыыны баҕарабын.

Биһиги оскуолабытыгар иҥэриммит, көрдөрбүт тулуурдаах, дьулуурдаах, уопсастыба интэриэһин өрө тутар, хаһан баҕарар көмөҕө кэлэр үтүө   хаачыстыбаларгын ыһыктымаҥ. Эксээмэннэргитин бары ситиһиилээхтик туттараргытыгар эрэллээхпин. Оскуолаҕыт аны эһигини ыалдьыт, доҕор быһыытынан мэлдьи кэтэһэр” – диэн иитилээччилэригэр алгыс тылларын анаата.

Быйыл Дьокуускайдааҕы кадетскай оскуола 9-с кылааһын 32 оҕо бүтэрэр (9 “А” кылаас салайааччыта – Т.В.Корякина, иитээччи-офицер – Ф.И.Никифоров, 9 “Б” кылаас салайааччыта – С.М.Новгородова, иитээччи-офицер — Е.Г.Рожин).

11 кылааһы 20 үөрэнээччи бүтэрэр (11-с “А” кылаас салайааччыта – О.Н.Аргунова, иитээччи-офицер – М.Н.Заборовскай, 11-с “Б” кылаас салайааччыта – М.А.Федорова, иитээччи-офицер – Ф.И.Соловьев).

11-с кылаас үөрэнээччилэрэ кадетскай куорпус знамятын  тутан киирэн 10-с кылаастар эрэллээх илиилэригэр туттарыылара, знамяларын кытта быраһаайдаһыылара бэйэтэ туспа ураты долгутуулаах түгэн.

Төрөппүттэр оҕолорун бу сылларга үөрэппит, сыраларын уурбут учууталларга, үлэһиттэргэ махтал бастыҥ тылларын анаатылар. Оҕолоругар олох киэҥ аартыгар ситиһиилэри баҕардылар.

Бүгүн Өрөспүүбүлүкэ болуоссатыгар үгэс быһыытынан “Ура!” хаһыы ньиргийдэ, кадетскай фуражка күөрэйдэ. Бүтэһик чуораанынан!