Өрөспүүбүлүкэ салалтата Нерюнгритааҕы көтөр фабрикатын тас салайыыттан таһаарар үлэни ыытар

Саха Өрөспүүбүлүкэтин салалтата Нерюнгритааҕы көтөр фабрикатын тас салайыыттан таһаарар үлэни ыытар. Ол туһугар предприятиеҕэ үбүнэн өйөбүл оҥоһуллар.

Ил Дархан Айсен Николаев бүгүн, олунньу 10 күнүгэр, быһа эпиир  кэмигэр бу туһунан иһитиннэрдэ.

«Көтөр фабрикатын үлэтигэр-хамнаһыгар үөскээбит кыһалҕалартан сылтаан фабрика кэлиҥҥи сылларга тастан салайыынан үлэлии олорор. Ол гынан баран, өрөспүүбүлүкэ бырабыыталыстыбата ылыммыт быһаарыыларын уонна «Туймаада» ФАПК нөҥүө бэриллибит субсидия көмөлөрүнэн күн бүгүн фабрика балачча эрэллээхтик үлэлии турар, бородууксуйата атыыга батарыллар. Онон үп-харчы киириитэ куһаҕана суох, тастан салайыыттан тахсыаҕар сөп буолла», — диэн бэлиэтээтэ Айсен Николаев.

Ил Дархан сотору кэминэн юридическай хайысхалаах бары боппуруостар быһаарыллыахтарыгар, итиэннэ көтөр фабриката туох да иэһэ-күүһэ суох салгыы үлэлиэҕэр эрэнэрин биллэрдэ.