Өргөннөөххө уот киирдэ

Уотунан хааччыллыы тыйыс усулуобуйалаах Саха сиригэр олус суолталаах. 

Бэҕэһээ Мэҥэ Хаҥалас улууһун Сыымаҕар дьоро күн буолла. Ол курдук, Өргөннөөххө уот лииньийэтин тардан бүтэрдилэр. Уопсайа 30 км уһуннаах ситим. Бу уоту тардар үлэни манна баһылыктаабыт Иван Матвеев көҕүлээбитэ. Онуоха «Саха сүөһүтэ» ГКП салайааччыта Александр Еремеевич Артемьев күүстээх туруорсуутун оччолорго Мэҥэ Хаҥалас улууһун баһылыга Николай Прокопьевич Старостин өйөөбүтэ төһүү буолбута. Ф.К.Попов аатынан сылгы собуота уоту тардыыны сакаастаабыта. Онон дириэктэр ИннокентийСанников саамай сөпкө дьоһун боппуруоһу туруорсубут.

Онуоха Никифор Павлович Дмитриев уонна Николай Николаевич Старостин уоту тардар үлэни ыыттылар. Бу иккиэн ИП-нан буолаллар. Киһи кэрэхсиирэ диэн Дмитрий Тихонов баһылыктаах улуус дьаһалтата үбүлээбит. Олохтоохтор бу үөһээ ааттаммыт дьоҥҥо уонна үлэлэспит Александр Докторовка, үлэһиттэргэ махтаналлар.
Таарыйа аҕыннахха, бу Өргөннөөххө барыыга 25 км сиргэ сылгы собуотун баазата, ону тэҥэ «Саха сүөһүтэ» тэрилтэ хаһаайыстыбата бааллар. Онон Өргөннөөххө уот кыһыннары быстыбакка баар буолуоҕа. Халыҥ хаар түһэ илигинэ, таһырдьа сылаас кэмнэри баттаһа уот лииньийэтэ үлэҕэ киирбитэ олус үчүгэй. Уонна өр сылларга туһалаатын.

Хаартыскалар олохтоох дьаһалтаттан