Өрт оскуолатыгар норуодунай бэйиэт Савва Тарасовка аналлаах тэрээһин ыытылынна

Бүгүн, муус устар 19 күнүгэр, Горнай улууһун Солоҕон нэһилиэгин Өрт орто оскуолатыгар норуодунай бэйиэт, суруналыыс, тылбаасчыт, СӨ Өрөгөйүн ырыатын ааптара Савва Иванович Тарасов 90 сыллаах үбүлүөйүн көрсө үөрүүлээх тэрээһин ыытылла турар.

Бэлиэтээн эттэххэ, Солоҕон нэһилиэгин Өрт орто оскуолата саха норуодунай бэйиэтэ Савва Иванович Тарасов аатын сүгэр.

Үөрүүлээх тэрээһин С.И. Тарасов аатынан Өрт орто оскуолатын үөрэнээччилэрин толорууларыгар Өрөгөй ырыатыттан саҕаланна. Улуус баһылыгын бастакы солбуйааччы С.С. Стручкова, Солоҕон нэһилиэгин баһылыга А.П. Александрова, С.И. Тарасов аатынан Өрт орто оскуолатын дириэктэрэ П.А. Тимофеев, улуустааҕы үөрэх управлениетын салайааччыта В.И. Сметанина, бэйиэт, прозаик, литературнай кириитик, тылбаасчыт, суруналыыс, СӨ норуодунай суруйааччыта С.А. Попов-Тумат уонна Арассыыйа суруйааччыларын, Суруналыыстарын сойуустарын чилиэнэ, педагогическай үлэ бэтэрээнэ, суруйааччы Александр Тарасов эҕэрдэ тыллары эттилэр.

Кэлбит ыалдьыттарга, кыттааччыларга бэйэлэрин ылбаҕай ырыаларын «Айылгы» ансаамбыл бэлэх уунна.

Салгыы күн устата «Бар дьонум өйүгэр-сүрэҕэр» научнай-практическай кэмпириэнсийэ уонна бэйиэт хоһооннорунан «Мин соргулаах соноҕоһум» ааҕыылар ыытыллаллар диэн Горнай улууһун дьаһалтатын пресс-сулууспата иһитиннэрэр.