Евгений Григорьев “Кыһын Саха сириттэн саҕаланар” бэстибээли арыйда

Бүгүн Дьокуускай куорат дьаһалтатын баһылыга Евгений Григорьев Былатыан Ойуунускай аатынан Саха академическай тыйаатырыгар үөрүүлээх быһыыга-майгыга  “Кыһын Саха сириттэн саҕаланар” бэстибээл саҕаламмытын  биллэрдэ.

Уонтан тахса хонук устата Саха сирин олохтоохторугар бренд буолбут «Саха сирин амтана», «Саха сирин бирилийээннэрэ», «Строганина-2025» аатырбыт бэстибээллэри тэҥэ, 30-тан тахса араас хайысхалаах, ис хоһоонноох тэрээһиннэр: быыстапкалар, кэнсиэр арааһа, маастар-кылаастар, спортивнай күрэхтэһиилэр уо.д.а. буолуохтара. Бары улуустарга Саҥа дьыллааҕы харыйалар араас уоттара күлүмүрдүө.

Быйыл Арассыыйа кэккэ куораттарын, эрэгийиэннэрин тэҥэ, кыраныысса таһыттан  Кытайтан, Монголияттан, Перуттан ыалдьыттар кэллилэр.

Перуттан кэлбит Норуоттар икки ардыларынааҕы хаар уонна муус оҥоһук куонкуруһун кыттааччыта  Хосе Луис Малька Атенсио:

— “Саха сириттэн кыһын саҕаланар» бэстибээл аан дойдуга аатырар. Миэхэ бу суолталаах тэрээһиҥҥэ кыттыым улахан чиэс. Онон бары сатабылбын ууран туран хаар уонна муус оҥоһугун күрэһигэр кыттыам”, — диэн ЯСИА-ҕа санаатын үллэһиннэ.

Быйыл 14-с төгүлүн ыытыллар тэрээһини үөрүүлээхтик арыйыы Саха тыйаатырыгар аан бастакытын ыытылынна.