Гаврил Терентьев: «Дойдуга суоһуур кутталы киэр анньарга көмө-тирэх буола туруохтаахпыт”

«Дойдуга суоһуур кутталы киэр анньарга көмө-тирэх буола туруохтаахпыт”, — диир СӨ Култуура нэһилиэстибэтин эбийиэктэрин харыстааһыҥҥа департаменын салайааччытын солбуйааччы Гаврил Терентьев.
— Дойду Бэрэсидьиэнэ В.В.Путин анал байыаннай эпэрээссийэни ыытар быһаарыныытын өйүүбүн. Тоҕо диэтэххэ, бастатан туран, кини ити иннинэ элбэхтэ остуол тула олорон эйэлээхтик быһаарсыахха диэн этиилэрин ылымматахтара. Ол иһин, ити эрэ быһаарыыны ылынар суол хаалбыта. Иккиһинэн, арҕааҥы дойдулар Арассыыйа экэнэмиичэскэй өттүнэн сүбэрэнитиэтигэр суоһаатылар. Российскай Федерация кимтэн да тутулуга суох олороругар, усулуобуйата, айылҕатын баайа, ис кыаҕа барыта баар. Судургутук эттэххэ, ити дойдулар бэйэлэрин саппаастарын бүтэрбит буоланнар, биһиги судаарыстыбабыт баайыгар-дуолугар ымсыыраллар, иҥсэлээх харахтарын хатаабыттара ыраатта. Ол иһин Арассыыйаны мөлтөтө, ыһа сатааннар, араас ньыманы бары тутта сылдьаллар. Үйэлэр тухары ыаллыы, бырааттыы олорбут Украинаны соруйан ускайдааннар, биһиги судаарыстыбабытыгар кутталлаах дойдуга кубулуттулар.
Маннык быһыыга-майгыга Бэрэсидьиэммит сөптөөх быһаарыыны ылынна – ити кутталы суох оҥорорго. Анал байыаннай эпэрээссийэ ыытылларын билэр дьонум, аймахтарым өйүүллэр, тастыҥ бырааппыт дуогабарынан инники кирбиигэ барбыта. Тэрилтэбит кэлэктиибэ харчы хомуйан көмө пуондатыгар туттарбыта.
Бу уустук кэмҥэ ким да санаатын түһэриэ суохтаах. Саамай сүрүнэ, дойду олохтоохторо бары биир сомоҕо буоларбыт наада. Бэйэбит испитигэр күүскэ түмсэн, дойдуга суоһуур кутталы киэр анньарга көмө-тирэх буола туруохтаахпыт.