Геннадий Бесперстов: «Патриотическай иитиини күүһүрдэрбит эрэйиллэр»

Уус Маайа улууһугар «Биир ньыгыл Арассыыйа» бэлитиичэскэй баартыйа олохтоох салаатын салайааччыта Геннадий Бесперстов байыаннай эпэрээссийэ уонна ыччаты дойдуга бэриниилээх буолуу тыыныгар иитии боппуруостарыгар санаатын үллэһиннэ.

— Өскөтүн биһиги бу байыаннай эпэрээссийэни кэмигэр сөпкө эрдэлээн саҕалаабатахпыт буоллар, ити ордук куһаҕаннык саҕаланыан сөбө. Дойдубут бары дьоно-сэргэтэ биир сомоҕо буолуохпутун наада. Биһиги Уус Маайабытыгар олохтоох дьоммут биир киһи курдук түмсүүлээҕэ көстөр. Ол курдук, улууска «Своих не бросаем!» пуонда тэриллэн, олохтоохтор саллааттарга наадалаах малы-салы, анал таҥаһы-сабы, эми-тому, ас бородууктатын уо.д.а. хомуйан аҕалаллар. Саллааттарбыт дьиэ кэргэттэригэр олоххо-дьаһахха араас көмө оҥоһуллар.

90-с сыллартан дойдуга бэринилээх буолуу тыыныгар иитии боппуруоһугар улахан көтүтүү тахсыбытынан ити кэмҥэ улааппыт ыччаттарбыт арҕааҥҥы сыаннастар сабыдыалларыгар дьайдаран улааппыта. Ону билигин көннөрөр үлэ барыахтаах – төрөөбүт дойдуну таптыырга, бэриниилээх буоларга, патриотическай иитиини күүһүрдэрбит эрэйиллэр.

Биһиги уолаттарбыт, эр дьоммут байыаннай дьайыылар бара турар сирдэриттэн кыайыы аргыстаах этэҥҥэ эргиллэн кэлэллэригэр баҕарабын!