Голболга Нам улууһун Баһылайа сөхтөрдө (ВИДЕО)

Амма улууһа далааһыннаах спортивнай тэрээһини ыытарга баай уопуттаах. Бу улууска 2019 сыллаахха өрөспүүбүлүкэ норуоттарын 7-с спортивнай оонньуулара ыытыллыбыта.

Онон күрэхтэһиилэри ыытарга успуорт эбийиэгэ үгүс. Күрэхтэһээччилэри социальнай эбийиэктэргэ түһэрэллэр. Онон бүгүҥҥү спартакиадаҕа туох барыта силигин ситэн бэлэм.
Тэрийээччилэр бэлиэтииллэринэн, Амма улууһун Бөтүҥ нэһилиэгэр өрөспүүбүлүкэҕэ адаптивнай успуорт көрүҥэр соҕотох спортивнай саала баар. Бу 2019 сыллааҕы спортивнай оонньууларга анаан тутуллубут эбийиэк. СӨ Успуорка миниистирин солбуйааччы Гаврил Мохначевскай бэлиэтээбитинэн, адаптивнай успуорт көрүҥнэригэр

Аммаҕа буола турар спартакиадаҕа спортсменнар үс бөлөххө хайдыһан күрэхтэһэллэр: илии-атах өттүнэн доруобуйаларынан хааччахтаах дьон, харахтарынан инбэлииттэр уонна кулгаахтарынан истибэт дьүлэй дьон.
Бүгүн голболга харахтарынан куһаҕаннык көрөр инбэлиит дьон күрэхтэстилэр. Мин тус бэйэм «голбол» диэн бэрт интэриэһинэй күрэхтэһиини аан бастаан көрдүм. Бэрт кэрэхсэбиллээх эрээри, доруобуйаларынан хааччахтаах дьоҥҥо олус уустук күрэхтэһии курдук көрдүм. Доруобай да киһи итинник уустук күрэхтэһиини кыайара, тулуйара саарбах. Нам улууһун спортсменнара бу көрүҥҥэ олус күүстээхтэр эбит. Күрэхтэһии быраабылата маннык: харахтарынан инбэлиит үс киһиэхэ анал ачыкы кэтэрдэллэр. Онон спортсменнар олорон эрэ мээчик иһигэр угуллубут кыракый чуораанчык тыаһынан эрэ сирдэтэн оонньууллар. Син эмиэ футбол курдук боруотаҕа киллэриэхтээхтэр. Мээчик 1,5 киилэ ыйааһыннаах. Мин күрэхтэһиини кэтээн көрөр кэммэр Чурапчы уонна Нам улуустара киирсэ сылдьаллара. Нам улууһутттан олус да күүстээх хамаанда кэлбит! Субуруччу боруотаҕа мээчиктэрин киллэрэн, көрөөччүлэри олус соһуттулар да, үөртүлэр да. Намнар голболга күрэхтэһэн бүтээт, кинилэри күүтэн турар массыынаҕа сүүрдүлэр. Аны «Амма» стадиоҥҥа тиийэн, сүүрүүгэ кыттыахтаахтар эбит.

Боруотаҕа үтүмэн мээчиги киллэрбит дьоруой Баһылайы эккирэтэн көрдүм да, намнар 8 №-дээх уолларын эчэйбит илиитин бэрэбээскилэтээт, массыынаҕа киллэрэн, Амма диэки куугуната турдулар. Чэ, күрэхтэһии бүтэрэ өссө да ыраах. Аатын эрэ билэн хаалбыт адаптивнай спартакиада бүгүҥҥү дьоруойун кытта анаан көрсүөм диэн эрэх-турах санаалаах күрэхтэһии атын көрүҥнэрин көрө-истэ сүүрдүм…