Горнай баһаарынайдара оҕолору уоттан сэрэхтээх буоларга үөрэтэллэр

Горнай улууһунааҕы  16-с №-дээх Баһаары утары судаарыстыбаннай сулууспа отделын үлэһиттэрэ Бэрдьигэстээх орто оскуолатын үөрэнээччилэригэр аһаҕас уруогу уонна экскурсияны ыыттылар.

Бу оҕолорго баһаарынай идэтин туһунан өйдөтөргө, интэриэһи уһугуннарарга, ону тэҥэ сэрэтэр үлэни ыытарга сөптөөх тэрээһин буолар диэн СӨ Баһаарынай сулууспата иһитиннэрэр.

Оҕолорго баһаартан сэрэхтээх буолуу төрүттэрин үөрэтии улахан суолталаах. Баһаарынай сулууспа үлэһиттэрэ үүнэр көлүөнэҕэ баһаартан куттал суох буолуутун, баһаар тахсар төрүөттэрин кытта билиһиннэрдилэр, ону таһынан уоту сэрэхтээхтик туттууга уонна баһаар тахсар түгэнигэр сөптөөхтүк дьаһаныыга үөрэҕи ыыттылар.

Көрсүһүү кэмигэр оскуола үөрэнээччилэрэ баһаарынай таҥаһын кэтэн, быыһааччылар баһаары умуруорарга туһанар уустук эрээри наадалаах тэриллэрин тутан-хабан көрдүлэр, баһаарынай массыына иһигэр олорон, кислороднай маасканы кэтэн көрдүлэр. Уруок бүтүүтүгэр быыһааччылар оҕолорго үчүгэйдик үөрэнэллэригэр баҕардылар уонна баһаартан сэрэхтээх буолуу быраабылаларын кытаанахтык тутуһарга эттилэр.