Госавтоиниспиэксийэ үлэһиттэрэ аара суолга массыыната алдьаммыт дьахтарга көмөлөстүлэр

Ааспыт өрөбүллэргэ Госавтоиниспиэксийэ автопатрула «Бүлүү» федеральнай суол кытыытыгар массыына турарын бэлиэтии көрбүттэр. Онно суоппар  дьахтар оҕолорун кытары Горнайтан куоракка айаннаан иһэн, тымныыга массыыната алдьанан олорор эбит.

Дьахтар  оҕолорун кытары  20 кыраадыс тымныыга икки чааһы быһа олорон тоҥмуттар. Массыынатын  собуоттуу, ааһан иһэр массыыналары тохтото сатаабыт. Ол гынан баран ким да көмөлөспөтөх.

Полицейскайдар суоппары уонна пассажирдары служебнай массыыналарыгар олордон, итии чэй иһэрдибиттэр. Ол кэмҥэ анал тэрилинэн  дьахтар массыынатын собуоттаабыттар.  Госавтоиниспиэксийэ үлэһиттэрэ дьиэ кэргэни Дьокуускайга тиийиэхтээх сирдэригэр диэри атаарбыттар. Ыал ийэтэ  полицейскайдарга үтүө санааларын, көмөлөрүн иһин махтаммыт диэн ИДьМ пресс-сулууспата иһитиннэрдэ.