Госдуумаҕа миграннарга сымыйанан ийэ, аҕа уонна ыал буолууну утары сокуон ылылынна

Госдуумаҕа дьокутааттар миграннарга сымыйанан ийэ, аҕа уонна ыал буолууну утары охсуһууга туһуламмыт сокуон барылын бүтэһиктээх ааҕыыга ылыннылар. Сокуоҥҥа киирэр тустаах уларыйыылары Госдуума бэрэссэдээтэлэ Вячеслав Володин иһитиннэрдэ.

«Бу кэмтэн ыла биһиги дойдубутугар кубуотаны таһынан олохсуйарга көҥүлү ылыы ыал буолуохтарыттан эбэтэр оҕону ииттэ ылыахтарыттан үс сылтан кыра буолуо суоҕа ирдэнэр», — диэн Вячеслав Володин биллэрдэ.

Ону таһынан, быстах кэмҥэ олорорго көҥүл ылаары сымыйанан ыал буолан холбоспуттара суутунан билиннэҕинэ, омук гражданиныгар бэриллибит көҥүл тохтотуллар. «Маннык дьаһал миграннарга суут быһаарыытынан төрөппүт буолуу бырааптара быһыллыбыт, оҕо иитэ ылыылара тохтотуллубут эбэтэр хааччахтаммыт буоллаҕына туһаныллар», — диэн эбэн быһаарда Госдуума бэрэссэдээтэлэ.

«Миграционнай бэлиитикэни тупсарыы үлэтэ салҕанар. Өссө алта сокуон барылын дьүүллэһиэхпит», — диэн Вячеслав Володин эттэ. Бу туһунан Госдуума пресс-сулууспата иһитиннэрэр.