Гроссмейстер сиэссийэтин кыттааччыларыгар турнир ыыттылар

Бу күннэргэ саахымат өрөспүүбүлүкэтээҕи кэнгириэһин иитинэн буола турар гроссмейстерскай сиэссийэ кыттыылаахтара, ылбыт билиилэрин чиҥэтэллэрин туһугар бэйэлэрин икки ардыларынааҕы турниры ыыттылар.

Гроссмейстер Антон Шомоев этэринэн, истээччилэртэн уопсайа уон хамаанда тэриллибит.

“Бастакы күннэргэ улахан билсиһэр лиэксийэлэр буолбуттара, дебюттары суруммуттара, ааттаах-суоллаах саахыматчыттар баартыйаларын үөрэппиттэрэ. Билигин кинилэр сүбэлиир баартыйалары оонньууллар. Ол аата биир хамаанда биир оонньооччу курдук, сүбэлэһиэхтэрин, бэйэлэрин хамаандаларын чилиэнин түгэннэрин суоттуохтарын сөп. Сыыспат инниттэн бэйэ-бэйэлэрин булгуччу бэрэбиэркэлииллэр, хамаанданан үлэлии, ырыта уонна саахыматы арыый дириҥэтэн билэ үөрэнэллэр”, — диэн норуоттар икки ардыларынааҕы гроссмейстер кэпсиир.

Хамаандаларын аатын оҕолор бэйэлэр толкуйдаабыттар, олор кэккэлэригэр “Р.А.Н.”, “Три богатыря”, “Королики”, о.д.а. бааллар. Саала иһигэр уу-чуумпу, оонньуу тыҥааһына биллэр, хамаандалара судургута суохтар, хас биирдиилэрэ улахан уопуттаах уонна эрэгийиэн, бөлөх (зона), Бүтүн Арассыыйатааҕы күрэхтэһиилэр кыайыылаахтара. Оҕолор бэйэ-бэйэлэрин билсэллэр, олор кэккэлэригэр атын эрэгийиэннэртэн кэлбиттэри эмиэ. Саахымат остуолугар аҕыйаҕа суохтук көрсөн тураллар. Ол эрээри, кыайыыга дьулуһуу доҕордоһууну атахтаабат, көнөтүнэн, дьоһуннаахтык уонна бастыыр туһугар оонньонуллуохтаах диэн эдэр саахыматчыттар бэлиэтииллэр.

Максим Костерин, Соҕуруу Сахалин, 10 саастаах: “Мин эмиэ Соҕуруу Сахалинтан кэлэ сылдьар биир дойдулаахпын кытта оонньуубун. Кини уобаласпытыгар чөмпүйүөн. Мин хамаандабар өссө Уһук Илиҥҥи сүүмэрдиир күрэхтэһиилэргэ билсибит оҕолорум бааллар”, — диэн этэр.

Артур Васильев, Дьокуускай, 12 саастаах: “Бу көннөрү турнир курдук, дьиҥнээх күрэхтэһииттэн уратыта диэн, хамаандам дьоно көмөлөһөллөр. Биһиги хамаандабыт аата “РАН – Разновидный Александр Невский” диэн, бэйэбит толкуйдаабыппыт. Хамаандабытыгар төрдүөбүт – Полина, Егор, Валерия, мин”, — диэн кэпсиир.

Давид Местников, физика-тиэхиньиическэй лиссиэй (Дьокуускай), 13 саастаах: “Биһиги хамаандабыт аата “Три богатыря”, састааппытыгар Владислав Жирков, Артем Солдатов уонна мин баарбыт. Утарсааччыларбыт күүстээхтэр. Хомойуох иһин, бэҕэһээ “А3” хамаандаҕа кыайтаран кэбистибит, олус уустук партия этэ, 4 чаас устата барбыта. Бу төһө даҕаны эрчиллии буолбутун иһин, дьоһуннаах, дьиҥнээх күрэхтэһии курдук, төһө кыалларынан күүспүтүн түмэбит. Биһиэхэ сорудах курдук партиялары биэрэллэр, ону оонньуохтаахпыт”, — диэн этэр.

Антон Шомоев этэринэн, эрдэ былааннамматаҕа эрээри, кыайыылаах хамаандаҕа бириис туттарар буолбуттар. “Көннөрү эрчиллэр турнир буолуо диэн суоттаммыппыт эрээри, оҕолор умсугуйан, дуоспуруннаахтык ылынан туран көхтөөхтүк оонньууллар, онон бэлэҕэ суох хаалларар табыллыбат. Маладыастар, билиилэрин барытын түмэн туран оонньоотулар”, — диэн биллиилээх гроссмейстер бэлиэтиир.

СӨ саахымакка федерацията.