Хаандыгаҕа судаарыстыбаннай нүөмэрэ суох массыына уот саахалын таһаарбыт

Ыам ыйын 10 күнүгэр сарсыарда 08:34 чааска Хаандыга бөһүөлэккэ саахал тахсыбытын кэннэ уот арахсыбыт.

Ол курдук, судаарыстыбаннай нүөмэрэ суох массыына бөһүөлэги хааччыйар киин 6 кВ «Водоканал» уот лииньийэтин баҕанатын түҥнэри көппүт. Бу туһунан  “Якутскэнерго” Арҕааҥҥы электрическэй ситимнэрин пресс-сулууспата суруйар.

Алдьаммыт учаастактан Хаандыга бөһүөлэк барыта уота суох хаалбыт. Томпотооҕу РЭС энергетиктэрэ уоту чөлүгэр түһэриигэ үлэлииллэр. Быраабы араҥаччылыыр уорганнар саахал буруйдааҕын көрдүүллэр.

Энергетиктэр ЛЭП зонатыгар ханнык баҕарар маневрдар бобуулааҕын санаталлар. Быстыбыт уот лииньийэтэ 8-10 миэтэрэҕэ диэри ыраахха кутталы үөскэтэр. Уот лииньийэтигэр саахалы таһаарбыттар уокка оҕустарыахтарын уонна маассабай уот араарыытыгар тиэрдиэхтэрин сөп.