ХААРТЫСКАЛАР: Ретро маллаах ыалга дьон-сэргэ махтанар

Дойду ааттаах, суон сурахтаах диэн мээнэҕэ эппэппит. Ханна да сырыттаргын, дойдуларын үлэлэринэн-хамнастарынан, дьоһун олохторунан, ону сэргэ талба талааннарынан, дьикти дьарыктарынан ааттатар дьон хайаан да баар буолар.

Сунтаар улууһун Элгээйитигэр биир оннук киһинэн култуура үлэһитэ Эльвира Николаева буолар.Николаевтар киэҥ-куоҥ, күөҕүнэн симэммит тиэргэннэригэр киирдэххинэ, муннукка турар сырдык кырааскалаах дьиэҕэ хараҕыҥ хатана түһэр. Дьэ, манна баар эбит ааспыт олохпут, сэбиэскэй кэм кэрэһиттэрэ!
Барытын илиигинэн тутан, сүрэххэр чугаһатан ыллаххына, төрөппүттэриҥ, дьиэ эйгэтин «сытын-сымарын», сылаас тыынын ыларга дылы буолаҕын.
Бу дьикти баай кэллиэксийэ биир ыал холугар олус элбэҕин, баайын сөҕө-махтайа көрөҕүн.

Ыал ийэтэ эдэр эрдэҕиттэн бу абылаҥнаах дьарыкка ылларбытын туһунан сэһэргиир. Ханна да сырыттар, былыргы малы-салы, иһити-хомуоһу сэргии, хомуйа сылдьыбыт. Саамай үөрэрэ диэн, нэһилиэгин дьоно туох маллаахтарын, таҥастарын-саптарын бэйэлэрэ тылланан биэрэллэр. Ол түмүгэр Култуура киинэ туруорар пьесаларыгар, инсценировкаларыгар бэйэлэрэ биэрбит таҥастарын-саптарын көрдөхтөрүнэ, дьоммут нэһилиэстибэтин үйэтиттиҥ диэн махтаналлар.