“Халлааҥҥа тиийдэрбин” бэстибээли тэрийиэхтэрэ

Саха сирэ Бүтүн Арассыыйатааҕы “Халлааҥҥа тиийдэрбин” (Дотянуться до неба) пилота суох авиационнай систиэмэлэр бэстибээллэригэр аан маҥнайгытын хапсар. 18 эрэгийиэнинэн барыта 30 тыһ. киһи кыттыа диэн суоттаналлар.

Тустаах бэстибээл иитинэн пресс-кэмпириэнсийэ буолан ааста. Бу иннинэ пилота суох көтөр аппараат, билиҥҥитэ туттуллар ыыра кыараҕас дии саныырым. Онтум олохпут хас биирдии салаатыгар кэриэтэ туһаныллар кыахтаах эбит. Ол туһунан Бырабыыталыстыба бэрэссэдээтэлин солбуйааччы Анатолий Семенов сиһилии кэпсээтэ. Холобур, кыра ыйааһыннаах таһаҕаһы таһыыга, табаһыттар ыстааларыгар, аэрофотосъемкаҕа, ойууру харыстааһыҥҥа о.д.а. хас биирдии салааҕа. “Бэстибээл оҕону, ыччаты кэсиллээх, пилота суох көтөр систиэмэҕэ сыһыарар ньыманан буолар. Бу бүгүн Саха сиригэр номнуо олоххо хото киирэн эрэр. Биһиги эрэгийиэммит киэҥ иэнин уонна транспортнай логистикаҕа кыһалҕатын учуоттаан, пилота суох авиационнай систиэмэни олоххо киллэрэн, өрөспүүбүлүкэҕэ тырааныспар ситимин тупсарар санаалаахпыт. Улахан кыраттан саҕаланар, “Тиийдэрбин халлааҥҥа” бэстибээл курдук тэрээһиннэргэ нэһилиэнньэни сыһыаран, инникитин пилота суох аппарааттар киэҥник тарҕанан, күннээҕи олохпут сорҕотунан буолуохтара” – диэн бэрэссэдээтэли солбуйааччы бэлиэтээтэ.

Үөрэх уонна билим миниистирин бастакы солбуйааччы Михаил Присяжнай пилота суох авиационнай систиэмэ саҥа идэлэри үөскэтэрин этэр. Ол курдук, конструирование, хааччыйыы, пилотирование, программирование, о.д.а. салаалар  киирсиэхтэрин сөп диэн этэр. “Соторутааҕыта Бүлүүтээҕи профессиональнай педагогическай кэллиэскэ сырыттым. Пилота суох аппарааттарга аналлаах мастарыскыайы көрдүм. Кэллиэс баазатыгар олохтоох нэһилиэнньэни пилота суох аппарааттарга үөрэтиини тэрийбиттэр. Хас биирдии нэһилиэктэн иккилии-үстүү киһини үөрэтэллэр, кинилэр салгыы араас ыксаллаах быһыыга-майгыга көмөлөһүөхтэрин сөп: дьону көрдөөһүҥҥэ, баһаарга, өрүс барыытыгар…” – диир.

Дьокуускайдааҕы сибээс уонна информационнай технология, Покровскайдааҕы “Айтыын” сыыппара технологиятын кэллиэстэрэ лиссиэнсийэлээхтэрин, норуот хаһаайстыбатын араас салааларыгар исписэлиистэрин бэлэмниэхтэрин сөп диэн иһитиннэрэр.

“Арктика авиациятын кэскилэ” бырайыгынан Арктика улуустарыттан биирдии-иккилии оҕо Дьокуускайга “Бэс Чагда” кииҥҥэ авиацияҕа сыһыаннаах анал симиэнэҕэ кэлбиттэр. Пресс-кэмпириэнсийэҕэ кыттыбыт оҕолор симиэнэни биһирээбиттэрин туһунан санааларын үллэстэллэр.

СӨ идэҕэ урутаан бэлэмниир киин дириэктэрэ Владислав Хабаров бэстибээл бырагырааматын билиһиннэрдэ. Халлаан сэттэ хаттыгаһын курдук тэрээһин араас бырагырааматын толкуйдаабыттар, ону тэҥэ, эспиэртэр маастар-кылаастары биэриэхтэрэ, пилота суох көтөр эттиктэри билиһиннэриэхтэрэ, манна Саха сирин ситиһиитин көрдөрүөхтэрэ, баҕалаах дьон БПЛАка ГТО туттаран көрүөхтэрэ.   “Арассыыйа – мин устуоруйам” түмэл уонна Дьокуускай куорат 39-с нүөмэрдээх оскуолатыгар ити курдук киэҥ бырагыраамалаах бэстибээл буолуоҕа.

Тэрээһин үөрэнээччилэр күһүҥҥү сынньалаҥнарын кэмигэр, алтынньы 29-31 күннэригэр ыытыллар. Ураты, оҕо, ыччат киэҥ сэҥээриитин ылар бэстибээл буолара сабаҕаланар. Көтүтүмэҥ. Сайаапкаҕытын бу ыйыллыбыт сигэнэн https://leader-id.ru/events/515387 ыытыҥ.