«Халыма» суолга саахал түмүгэр биэс киһи эмсэҕэлээбит

Тохсунньу 8 күнүгэр Мэҥэ Хаҥалас улууһун отделын дьуһуурунай чааһыгар «Халыма» федеральнай суолга суол быһылаана тахсыбытын туһунан иһитиннэрии киирбит.

Саахал киэһэ 18:00 чаас саҕана суол 42-с биэрэстэтигэр – Төҥүлү сэлиэнньэтин уонна Аллараа Бэстээх бөһүөлэгин икки ардыларыгар тахсыбыт, диэн ИДьМ пресс-сулууспата иһитиннэрэр.

«Toyota Vitz» уонна «Toyota Voxy» массыыналар харсыспыттар. Борокуратуура иһитиннэриитинэн, 1987 с.т. дьахтар «Toyota Vitz» массыынанан айаннаан иһэн, утары суолга тахсан, «Toyota Voxy» массыынаны кытта харсыспыт. Саахал түмүгэр икки суоппар уонна үс пассажир — 1982 уонна 1998 с.т. дьахталлар, ону тэҥэ 2018 с.т. кыыс оҕо балыыһаҕа киллэриллибиттэр. Саахал түмүгэр «Toyota Vitz» массыына умайбыт. Уоту быһылаан тахсыбыт сиригэр тута кэлбит баһаарынайдар түргэнник умулларбыттар.