Саҥа дьылга туох иһин ыстарааптыахтарын сөбүй?

Дьиэ подъеһын Саҥа дьылга киэргэтиини кыбартыыра хаһаайыннарын уонна салайар хампаанньа сөбүлэҥэ суох оҥордоххо 15 тыһыынча солкуобайга диэри ыстарааптыахтарын сөп. Оттон юридическай сирэйдэргэ ыстараап суумата 400 тыһыынча солкуобайга диэри үрдүөн сөп.

Дьиэ тас эркинигэр гирляндалары, кумааҕы оҥоһуктары эбэтэр баннердары көҥүлэ суох ыйааһын, тупсаран оҥоруу быраабылаларын кэһии быһыытынан сыаналанан, баһаар куттала суох буолуутун ирдэбиллэрин кэһиигэ тиэрдиэн сөп.

Саҥа дьыллааҕы киэргэл иһин ыстарааптар

Чааһынай дьиэлээхтэр тиэргэннэрин киэргэтэллэрэ көҥүллэр, кинилэр кимтэн да көҥүл ылыа суохтаахтар. Ол эрээри, баһаартан сэрэхтээх буолуу ирдэбиллэрин булгуччу тутуһуохтаахтар. Ону тэҥэ, киэргэллэр эвакуация суолларын бүөлээбэттэрин уонна учаастак кыраныыссатын таһыгар тахсыбаттарын кэтиэхтээхтэр. Итини таһынан, айдаан-куйдаан олохтоммут нуорматын тутуһуохха наада, онтуката суох ыаллар үҥсүүлэрэ бэрэбиэркэҕэ төрүөт буолуон сөп.

Маҕаһыыннарга муниципальнай тупсаран оҥоруу быраабылалара үлэлииллэр: киэргэллэр дьоҥҥо мэһэйдээбэттэрэ, суоппардарга харгыстары үөскэппэттэрэ наада. Оттон дьиэ тас эркинигэр ыйанар киэргэллэр үксүгэр дьаһалтаны кытта сөбүлэһиини эрэйэллэр.

Илииттэн харыйа атыылаһыы ыстараапка тиэрдэр

Тыыннаах саҥа дьыллааҕы харыйаны чааһынай атыыһыттартан, көҥүлэ суох тэриллибит туочукалартан эбэтэр суол кытыытыттан атыыластахха, административнай эппиэтинэскэ тардыллыахха сөп. Тоҕо диэтэххэ, оннук мастар үгүс өттө сокуону кэһэн, көҥүлэ суох кэрдиллибит буолуохтарын сөп.

Өскөтүн  харыйаны сокуону кэһэн кэрдиллибитэ билэрэ дакаастаннаҕына, атыылаһааччы РФ Административнай кодексатын 8.28 ыстатыйатынан эппиэккэ тардыахтарын сөп. Гражданнарга 5 тыһыынча солкуобайга диэри ыстарааптаах. Манна сүрүн төрүөт – атыылаһааччы сокуону кэһии туһунан билэрэ дакаастаныыта буолар. Буолан ааспыт атыы-тутуу сибикитэ, ол иһигэр мас ханна атыыламмыта итини көрдөрүөн сөп. Исписэлиистэр харыйаны официальнай харыйа маҕаһыннарыттан эбэтэр бөдөҥ эргиэн ситимнэриттэн эрэ атыылаһарга сүбэлииллэр. Онно атыыһыт мас сокуоннайдык кэрдиллибитин уонна фитосанитарнай хонтуруолу ааспытын туоһулуур докумуоннары биэриэхтээх.

Сокуоннайа суох кэрдиллибит харыйа иһин ыстараап суумата үрдүк

Тыаҕа  көҥүлэ суох Саҥа дьыллааҕы харыйа эбэтэр атын мас кэрдиллибит буоллаҕына, түөрт тыһыынча солкуобайга диэри ыстараап көрүллэр.

РФ Административнай кодексын 8.28 ыстатыйатынан маһы кэрдии, алдьатыы  иһин маннык ыстарааптар көрүллэллэр:

• гражданнарга — 3-тэн 4 тыһыынчаҕа диэри солкуобай;
• дуоһунастаах сирэйдэргэ — 20-тэн 40 тыһыынчаҕа диэри;
• юридическай сирэйдэргэ — 200-тэн 300 тыһыынчаҕа диэри.

Фейерверктэн тахсыбыт баһаар иһин биир сыл хаайыыга угуохтарын сөп

Пиротехниканы быраабыланы кэһэн туһаннахха, ыстарааптанан эрэ муҥурдаммакка, дьиҥнээх хаайыыга барыахха сөп. РФ Административнай кодексын 20.4 ыстатыйатынан фейервердэри ыытыыга баһаартан сэрэхтээх буолууну кэһии иһин ыстарааптар көрүллэллэр:

• гражданнарга — 5-тэн 15 тыһыынчаҕа диэри солкуобай;
• ураты баһаартан сэрэхтээх буолуу эрэсиим кэмигэр — 10-тан 20 тыһыынчаҕа диэри солкуобай.

Оттон пиротехникаттан сылтаан баһаар турбут уонна хоромньута 250 тыһыынча солкуобайтан тахсыбыт буоллаҕына, РФ Холуобунай кодексатын 168 ыстатыйатынан холуобунай эппиэтинэс үөскүүр. Буруйдаах киһи 120 тыһыынча солкуобайга диэри ыстараапка, булгуччулаах эбэтэр көннөрүнэр үлэҕэ, эбэтэр биир сылга диэри көҥүлэ быһыллыан сөп.

Исписэлиистэр пиротехниканы аһаҕас сирдэргэ эрэ, инструкцияҕа ыйыллыбыт ырааҕы тутуһан туттарга сүбэлииллэр. Сорох эрэгийиэннэргэ фейервердэри анал тэриллээх сирдэртэн ураты атын сиргэ ыытары бобор эбии хааччахтар бааллар.

Саҥа дьылга түүн айдаан иһин ыстарааптыахтарын сөп

Саҥа дьылга түүн айдаан иһин атын ханнык баҕарар кэмҥэ курдук ыстарааптар көрүллэллэр. Үлэ күннэригэр киэһэ 23:00-тэн сарсыарда  7:00-гэ диэри, оттон өрөбүл уонна бырааһынньык күннэргэ киэһэ 23:00-тэн сарсыарда  8:00-ка диэри айдаарыы бобуллар. Өскөтүн айдаан олохтоммут нуорманы күүскэ аһардаҕына, ыаллар полицияҕа тыллыахтарын сөп.