Хараастан электроинструмены уорбут дьону буллулар

Ис дьыала министиэристибэтин Саха сиринээҕи салалтатын 2 №-дээх полиция отделыгар эр киһи харааһыттан электроинструменнарын уорбуттарын туһунан сайабылыанньа киллэрбит. Уопсайа 118 тыһыынча солкуобайдаах хоромньу оҥоһуллубут диэн ИДьМ пресс-сулууспата иһитиннэрэр.  

ИДьМ баайга-дуолга буруйу оҥорууну быһаарыыга отделын уонна Дьокуускайдааҕы 3-с №-дээх полиция отделын холуобунай ирдэбилин үлэһиттэрин кытта ыыппыт суһал көрдөөһүн үлэлэрин түмүгэр, Дьааҥы улууһуттан төрүттээх 29 уонна 23 саастаах дьон уорбуттара быһаарылынна.

Буруйдаахтар, түүн чааһынай дьиэлэр аттыларынан ааһан иһэн, биир харааһы көрөргө быһаарыммыттар. Уоруйахтар хараас аанын көҥү анньан баран, иһирдьэ киирбиттэр. Онтон  электроинструменнары уорбуттар.

Уоруллубут мал сороҕо эрэ буллуллубут. Уорбут дьоҥҥо  РФ Холуобунай кодексатын 158 ыстатыйатын 2 чааһынан («Уоруу»)  холуобунай дьыала тэрилиннэ. Бу ыстатыйанан буруйдаахтар 5 сылга диэри болдьоххо көҥүллэрэ быһыллыан сөп.