Харах быраастара Донбасс олохтоохторугар көмөлөһөллөр

Саха сириттэн харах быраастарын биригээдэтэ ДНӨ балыыһаларыгар үлэлээтилэр.

Биир нэдиэлэтээҕитэ миэдиктэр Донбасстан кэллилэр. Өрөспүүбүлүкэтээҕи офтальмологическай балыыһа кылаабынай бырааһа Иван Луцкан иһитиннэрбитинэн, Докучаевскайга уонна Кировскайга 2 312 киһиэхэ сүбэ-ама оҥоһуллубут, 573 киһини  эпэрээссийэлээбиттэр. Кинилэр ортоллоругар Саха сирин быраастара 102 саастаах кырдьаҕаска көмөлөспүттэр.

—Элбэх киһи хас эмэ сыллар тухары кыайан көмө ылбакка сылдьыбыт. Оттон сорохтор Саха сиригэр олорбуттар, үлэлээбиттэр. Кинилэр Саха сирин туһунан наһаа үчүгэйдик, истиҥник ахталлар-саныыллар. Биһиги  быраастарбытыгар наадалаах уонна туһалаах үлэлэрин иһин махтал!  — диэн ТГ-ханаалыгар Ил Дархан Айсен Николаев суруйар.

Кировскайга балыыһа филиалын өрөмүөнэ түмүктэннэ. Иван Луцкан ДНӨ доруобуйа харыстабылын миниистирин Дмитрий Гарцевы көрсөн Докучаевскайга иккис филиал арыллыытын боппуруоһун дьүүллэстилэр. Оччотугар Донбасс олохтоохторугар мэдиссиинэ көмөтүн оҥорорго табыгастаах буолар.

Санатар буоллахха, Саха сирин офтальмологтарын биригээдэтэ балтараа сыл иһигэр ДНӨ олохтоохторугар 3 тыһыынчаттан тахса эпэрээссийэни оҥордо.

Саха сиригэр маннык миэстэтигэр тиийэн көмөлөһүү тиһиктээхтик ыытыллар. Сыллата 100 000 тахса сүбэ-ама, уонунан тыһыынча эпэрээссийэ оҥоһуллар. Балыыһа филиаллара улуустарга тэрилинэн хааччыллаллар.

СӨ Ил Дарханын уонна Бырабыыталыстыбатын пресс-сулууспата