Харах мөлтөөһүнүн эрдэттэн сэрэтиэххэ сөп

Харах мөлтөөһүнүн эрдэттэн сэрэтиэххэ сөп диэн бэлиэтииллэр. Саха ыалын халандаарыгар (2007 с.) бу туһунан маннык суруллар.

Ытыстары бэйэ-бэйэлэригэр аалан сылытыллар уонна сырдык киирбэтин курдук тарбахтары бэйэ-бэйэлэригэр сыһыаран, ытыһы холбоччу тутан баран, тоҥолохтору остуолга ууран, харахтары саба тутуллар. Хараҕы таарыйыллыбат. Хараҥаҕа харах сынньанар уонна ытыстартан энергия ылар. Күҥҥэ 2-3 итинник 10-15 мүн. оҥордоххо киһи көрөрө тупсар.

Күн уота харах сайдыытыгар, доруобуйаҕа, настарыанньаҕа олус туһалаах. Киһи кырата 2-3 чаас таһырдьа күн уотугар сылдьыахтаах. Оччоҕо тириигэ Д битэмиин үөскээн киһи уҥуоҕа бөҕөргүүр. Хараҕыҥ көрөрө эмиэ тупсар.

Харахха туһалаах астарынан моркуоп, помидор, кыһыл биэрэс, моонньоҕон, черника буолаллар. Оҕо хараҕын, этин-хаанын сынньатар туһуттан  2-3 ч. устата күн аайы  таһырдьа күн уотугар сырытыннарыҥ. Киһи хаама, хамсана сылдьара кини бэйэтэ доруобай буоларыгар туһалаах.

Саха ыалын халандаарыттан, 2007 с.