“Харбалаах” суолугар аспаалы ууруу саҕаланна

Ытык Күөл сэлиэнньэтигэр “Харбалаах” эрэгийиэннээҕи  массыына суолун аспааллааһын саҕаланна.

Үлэ “Олоххо наадалаах инфраструктура” национальнай бырайыак чэрчитинэн бара турар.

Саха сиринээҕи массыына суолларын управлениета иһитиннэрбитинэн, аспаалынан-бетонунан бүрүллүбүт суол үрүт араҥата “Манчаары оонньууларын” саҕаланыыларыгар бүтүөхтээх. Оҥоһуллуохтаах суол уһуна 2,4 км, бэдэрээтчигинэн “Тааттаавтодор” хампаанньа буолар.

Оттон суол 1,5 км уһуннаах учаастага  аспаал алын араҥатынан хайыы-үйэ сабыллан сытар. Бэс ыйын 25 күнүгэр диэри хаалбыт 800 миэтирэни бүтүннүү бүрүйэр былааннаахтар. Аспаал-бетон булкааһыгын тэрилтэ бэйэтин собуотугар оҥорор.

Спартакиада саҕаланыытыгар суолга быстах кэмнээх бэлиэлэри оҥоруохтара. Туох баар үлэ балаҕан ыйыгар бүтэрэ былааннанар.