Айтана Аммосова хаартыскаҕа түһэриитэ.
Хатас нэһилиэгэр «Саха Өрөспүүбүлүкэтигэр физическэй култуураны уонна успуорду сайыннарыы» диэн судаарыстыбаннай уонна «2017-2032 сылларга Дьокуускай куорат социальнай инфраструктуратын биир кэлимник сайыннарыы» муниципальнай бырагыраамаларынан 2 285,36 кв.м. иэннээх спортивнай комплекс тутулла турар. Былаан быһыытынан, ахсынньы 25 күнүгэр үлэ түмүктэниэхтээх.
Саҥа спортивнай комплекс икки этээстээх, таһыгар кыра стадионнаах. Тутуу үлэтэ барбыта иккис сыла буолла. Эбийиэк 89% бэлэм турар. Онон үлэ этэҥҥэ болдьоҕор түмүктэннэҕинэ, 2024 сыл тохсунньу 1 күнүттэн оҕолор үөрэ-көтө сабыс-саҥа саалаҕа дьарыктанан саҕалыахтара.
Дьокуускай куорат успуорка уонна физическэй култуураҕа управлениетын начаалынньыга Эдуард Ефимов: «Туох баар успуорт көрүҥэр барытыгар аналлаах араас саалалар оҥоһуллаллар. Былаан быһыытынан манна 800-тэн тахса оҕо дьарыктаныахтаах. Оҕолор да, олохтоохтор да маннык тупсаҕай, бары ирдэбилгэ эппиэтиир саалаҕа дьарыктанан доруобуйаларын туруга тупсуо, успуорка ситиһиилэри аҕалыахтара диэн эрэнэбит», — диэн кэпсиир. Кини этэринэн, бу саалаҕа эһиил сайын Дьокуускайга ыытыллыахтаах «Азия оҕолоро» спортивнай оонньууларга кыттар сүүмэрдэммит хамаанда чилиэннэрэ дьарыктанан саҕалыахтаахтар.
Эбийиэк бастакы этээһигэр волейболлуур, баскетболлуур, футболлуур былаһааккалар тутуллуохтара. Иккис этээскэ буокса, тустуу саалата уонна дьаһалта хоһо баар буолуоҕа. Маны таһынан өссө хас да атын көрүҥҥэ анаммыт саалалар эмиэ оҥоһуллуохтара.
Тутуу үлэтин көрө сылдьан Хатастааҕы ДЮСШ тириэньэрин Анатолий Баишевы көрсөн кэпсэттибит. Кини өрөспүүбүлүкэ, судаарыстыба өттүттэн өйөбүл баар буолан, Хатас оҕолоро, олохтоохторо тутуу бара турарыттан олус үөрэллэрин, дьарыктаах буолуохтарын туһунан кэпсээтэ. Хатаска 1985 сыллаахха тутуллубут аарка быһыылаах успуорт саалата баара 2016 сыллаахха уокка былдьаммыт эбит. Онон билигин 300-чэ оҕо эргэ оскуоланы саала оҥостон дьарыктанар. ДЮСШ-ҕа алта тириэньэр үлэлиир. Оҕолор ордук сөбүлээн волейболунан, тустуунан, мас тардыһыытынан, хайыһарынан дьарыктаналлар диэн тириэньэр кэпсиир.
Хатастан өрөспүүбүлүкэҕэ киэҥник биллэр волейболистар, мадьынылар, многоборецтар, хайыһардьыттар тахсыбыттара. Онон саҥа саалаҕа дьарыктанан өссө да үрдүк ситиһиилэр кэлэ туруохтарын саарбахтаабаппыт.
2025 сылга биисинэһи өйүүр сыаллаах «Көдьүүстээх уонна күрэстэһиилээх экэниэмикэ» саҥа национальнай бырайыак саҕаламмыта. Национальнай бырайыак…
Арассыыйа Бэрэсидьиэнэ Владимир Путин көҕүлээһининэн ыытыллыбыт «Доруобуйа харыстабыла» национальнай бырайыагы олоххо киллэрии кэмигэр Саха сирин…
Ааспыт нэдиэлэҕэ байыастарга анаан үс тиэхиньикэ барда. Бу туһунан "Бары бииргэ Кыайыыга!" хамыыһыйа сүрүннүүр киинин…
Өлөөн улууһугар өрүһү туоруур суолу Өлөөн уонна Харыйалаах сэлиэнньэлэрин икки ардыгар астылар. Муус халыҥа 3…
Ил Дархан көҕүлээһининэн Арктика улуустарын үөрэҕин тэрилтэлэригэр эдэр исписэлиистэри сыһыарыыга туһаайыллар “Арктика учуутала” бырайыак ситиһиилээхтик…
Өрөспүүбүлүкэтээҕи доруобуйалара хааччахтаах оҕолорго аналлаах реабилитациялыыр кииҥҥэ байыаннай дьайыы кыттыылаахтарын дьиэ кэргэттэрин 642 чилиэнэ, ол…