Хатырык нэһилиэгэр Максим Кирович Аммосов аатынан Култуура-успуорт киинэ аһылынна

Бүгүн Нам улууһун Хатырык нэһилиэгэр М.К. Аммосов аатынан Элбэх өҥөнү оҥорор култуура-успуорт киинэ аанын тэлэччи аста.

Ил Дархан нэһилиэк олохтоохторугар саха норуотун чулуу уола Максим Кирович Аммосов аатын үйэтитиигэ улахан үлэни ыыппыттарын иһин махтанна уонна күүтүүлээх күнүнэн эҕэрдэлээтэ.

«Саха Өрөспүүбүлүкэтин 100 сыллаах уонна Максим Кирович Аммосов 125 сыллаах үбүлүөйдэригэр анаан былааннаммытын бу сылларга бары бииргэ үлэлээн толорбуппутуттан олус үөрэбин уонна киэн туттабын. Нэһилиэккэ диэри тиийэр суол бүтүннүү аспаалланна, саҥа оҕо уһуйаана тутулунна, оскуолаҕа хапытаалынай өрөмүөн ыытылынна, оттон бүгүн бэртээхэй култуура-успуорт киинэ үлэҕэ киирдэ. Бу өрөспүүбүлүкэҕэ тыа сиригэр киллэриллибит биир бастыҥ киининэн буолар», – диэтэ Айсен Николаев.

Аныгы технологиялары туһанан тутуллубут дьиэҕэ универсальнай саалалаах успуорт комплекса, 60 миэстэлээх оҕо ускуустубатын оскуолата, 150 миэстэлээх саалалаах «Сайдам» норуот айымньытын дьиэтэ, 20 миэстэлээх ааҕар саалалаах бибилэтиэкэ уонна 10 тыһыынча туомнаах кинигэҕэ харайар сир баар.
Бибилэтиэкэ сэбиэдиссэйэ Ульяна Антонова саҥа Култуура-успуорт саалатыгар аныгы ирдэбилгэ эппиэттиир дьиэни биэрбиттэриттэн олус үөрэбин диир.

«Саҥа бибилэтиэкэҕэ 4 үлэ миэстэлээх медиа-киин баар, онно ыаллыы сытар оскуола оҕолоро дьарыктаныахтарын сөп. Билигин ааҕааччы өссө элбиэҕэ диэн эрэнэбит», – диэтэ Ульяна Антонова.
Успуорт ыстаарсай инструктора Айаал Алексеев нэһилиэк олохтоохторо киэҥ-куоҥ оонньуур уонна тренажернай саала аһылларын күүппүттэрин туһунан эттэ.

«Нэһилиэккэ көҥүл тустуу, волейбол сиэксийэлэрэ үлэлииллэр. Оонньуур саала иэнэ 540 квадратнай миэтэрэ. Манна тэҥҥэ 40-ча киһи дьарыктаныан сөп. Саҥа киин үлэҕэ киирбитинэн, успуорка өссө үчүгэй түмүктэри ситиһиэхпит диэн эрэнэбин», – диэтэ Айал Алексеев.

Эбийиэк уопсай иэнэ 2,5 тыһыынча кв.м. тахса. Бастакы этээскэ ааҕар саала, медиа-киин, костюмернай, хорга аналлаах кэбиниэт, прикладной искусство кэбиниэтэ, успуорт саала, таҥас уларыттан хос уонна суунар сир бааллар. Иккис этээскэ звукоаппаратнай, методическай пуонданы харайар саала, уус-уран хореография кэбиниэтэ, мэдиссиинэ кэбиниэт, тириэньэр, тренажернай саала бааллар.

Дойду бэрэсидьиэнэ Владимир Путин көҕүлээбит «Культура» национальнай бырайыак болҕомто киинигэр тутуллар – дойду үрдүнэн култуура сыаннастарын тэрийии уонна онуоха кыаҕы улаатыннарыы буолар.