Идэҕэ бастыҥ: АЛРОСА-ҕа идэҕэ маастарыстыба чемпионата буолла

Ааспыт нэдиэлэҕэ АЛРОСА хампаанньаҕа «Идэҕэ бастыҥ» диэн идэҕэ маастарыстыба чемпионата буолла. Күрэхтэһиигэ структурнай подразделениелартан уонна Мииринэйтэн, Айхалтан, Удачнайтан, Дьокуускайтан, Архангельскайтан, Москваттан дочернай уопсастыбалартан оробуочай идэлэр исписэлиистэрэ кытыннылар.

Бу -– АЛРОСА иккис киэҥ хабааннаах корпоративнай куонкуруһа, бастакы чемпионат 2022 сыллаахха ыытыллыбыта. Быйыл чемпионат АЛРОСА 14 подразделениетыттан уонна дочернай уопсастыбаларыттан алмаастаах хампаанньа 79 идэлээх киһитин түмтэ. Кинилэр алта күн устата Мииринэй уонна Айхал былаһааккаларыгар теорияҕа уонна быраактыкаҕа бэйэлэрин маастарыстыбаларын көрдөрөн, 9 хайысхаҕа бастыыр иһин кииристилэр.
««АЛРОСА идэҕэ бастыҥа» чемпионат -– күрэхтэһии эрэ буолбатах. Бу -– оробуочай идэлэр биһиги хампаанньаҕа уонна дойдуга барытыгар хайдах курдук суолталаахтарын биһиги үлэһиттэрбитигэр уонна хайа-байытар бырамыысыланнаһы кытары сибээһэ суох дьоҥҥо көрдөрөр кыах. АЛРОСА бэйэтин дьыалатын баһылаан, олоҕун алмаастаах хампаанньаҕа үлэни кытары сибээстээбит дьону барыларын үрдүктүк сыаналыыр», -– диэн АЛРОСА генеральнай дириэктэрэ Павел Маринычев эттэ.
Чемпионат – полигоҥҥа уонна сыахтарга күрэхтэһиилэр эрэ буолбатахтар. Чемпионат быстыспат сорҕотунан дьыалабыай бырагыраама буолар. Бырагыраамаҕа трениннэр уонна «Настаабынньык -– идэтийбит үлэһит» курдук оонньуулар, дискуссиялар, «төгүрүк остуоллар» уонна салайааччылары кытары дьыалабыай сарсыардааҥҥы аһылык киирэллэр. Тэрийээччилэр этэллэринэн, маннык алтыһыы, сэһэргэһии чопчу үөрүйэхтэри ыларга, кэлэктииби сомоҕолуурга уонна түмүктээх үлэ эйгэтин оҥорорго көмөлөһөр. Холобур, улахан кыамталаах самосваллар суоппардара уонна тиэйэр-таһар массыыналар (ПДМ) машинистара дьоһун суолталаах боппуруостартан биирдэстэрин -– омук тиэхиньикэтин солбуйуу уонна онно харыстабыллаах сыһыан туһунан дьүүллэстилэр. Быйыл хампаанньа массыына пааркатын руданы таһар саҥа БЕЛАЗ-тарынан, автопоезтарынан толордо, элбэх комплектующайы уларыттылар.
«Айхалга хампаанньа саамай киэҥ хабааннаах корпоративнай тэрээһиннэриттэн биирдэстэрэ -– «Идэҕэ бастыҥ» чемпионат аан бастакытын ыытылынна. Маннык күрэхтэһиилэр оробуочай идэ кэскиллээҕин көрдөрөргө уонна кыттааччылар идэҕэ таһымнарын үрдэтэргэ улахан суолталаахтар дии саныыбын. Куонкурус сорудахтарын таһынан, кыттааччыларга дьыалабыай уонна култуурунай бырагыраамалар бэлэмнэммиттэрэ», -– диэн Айхаллааҕы Хайа-байытар кэмбинээт дириэктэрин солбуйааччы Сергей Домброван кэпсээтэ.
Ол да буоллар, ордук кэрэхсэбиллээҕэ уонна көстүүлээҕэ -– күрэхтэһиилэр. Бастыҥ ааты ылар иһин араас оробуочай идэ бэрэстэбиитэллэрэ: электромонтердар, силиэсэрдэр, грохотовщиктар, улахан кыамталаах массыыналар, араас тырааныспар суоппардара, ПДМ уонна экскаватордар машинистара, сыбаарсыктар уонна алмааһы наардааччылар күрэхтэһэллэр.

Алмааһы наардааһын

Алмааһы наардыырга бэйэтин маастарыстыбатын Биир кэлим батарар тэрилтэттэн, Алмааһы атыылыыр Саха сиринээҕи тэрилтэттэн уонна алмааһы наардыыр киинтэн 5 исписэлиис көрдөрдө. Кинилэр 50 таастан кэлэксиэйэни оҥордулар. Кристаллар көрүҥнэрин уонна хаачыстыбаларын быһаарарга судьуйалар баара-суоҕа 90 эрэ мүнүүтэни биэрбиттэрэ. Уопсайынан, сорудаҕы бары үчүгэйдик толордулар, онон «алмаас харах» диэн этии чопчу кинилэр тустарынан.

Наталья Осипова, ЯПТА алмааһы наардааччыта:
– Кырдьык, кыттааччылар энергетикалара, үөрүүлэрэ-көтүүлэрэ уонна, биллэн турар, долгуйуулара биллэр. Мин алмааһынан эргинэр Саха сиринээҕи тэрилтэттэн «Наардааһын» диэн компетенцияҕа кыттыбыппыттан үөрдүм. Биһиги манна эмиэ кыайыылаах -– бэйэм подразделениебыт кыайыылаахтарын быһыытынан кэлбиппит.

Матрена Роббек, ЯПТА сүрүн эспиэрэ:
-Чемпионакка кыттыы күрэхтэһээччилэргэ бэйэлэрин үөрүйэхтэрин көрдөрөр, ону таһынан трениннэргэ дьыалабыай оонньууларга кыттар, хампаанньа атын подразделениеларыттан биир идэлээхтэргин кытары уопуту атастаһар кыаҕы биэрэр, онон идэҕэр салҕыы сайдаргар тугунан да сыаналаммат билиини ылаҕын.

Экскаватордар суоппардара

«Мастерской боулер», «Филиграннай бармен», «Трубочист» -– бу экскаватор машинистарын сорудахтара. Идэлээх дьон улахан хомуоһу баһылыыр маастарыстыбаларын көрдөрдүлэр: баскетбол мээчигинэн боулинг кеглин сууллара, биэдэрэни уунан толоро, араас иэннээх турбаҕа палочкалары таба киллэрэ сатаатылар, ону сэргэ ыстакааннары пластик бытыылкаттан уунан толордулар.

Евгений Седых, «Анаабыр алмаастара» экскаваторын машиниһа:
– Бу иннинэ бириискэҕэ күрэхтэһиилэргэ иккитэ кыттан иккис уонна үһүс миэстэлэри ылбытым. Бу сырыыга күрэхтэһиигэ кыайан, дьэ, АЛРОСА күрэхтэһиитигэр подразделением аатыттан кытынным. Күрэхтэһиигэ кыттар путевканы миэхэ муус устарга оччолорго «Анаабыр алмаастара» дириэктэрэ Павел Мыринычев туттарбыта.
Күрэхтэһиилэр сорудахтара миэхэ ыарахана суох этилэр. Тастан эрэ көрдөххө ыарахан курдуктар. Түмүктэргэ ордук киһи долгуйара дьайар, туох да диэбит иһин, күрэхтэһии буоллаҕа. Онтон миэхэ ордук туох ыарахан этэй диир буоллахха, биэдэрэни уунан толоруу сорудаҕа ыарахан этэ.

Алексей Сергеев, МУАД экскаваторын машиниһа:
-Мин көрүүбэр, ордук уустук сорудаҕынан бастакы сорудах этэ: куубуктары ууруу уонна биэдэрэни уунан толоруу.

Улахан кыамталаах массыыналар суоппардара уонна ПДМ машинистара

Улахан кыамталаах массыыналар суоппардарын уонна ПДМ машинистарын ортолоругар күрэхтэһиилэр эмиэ киһини тардар этилэр. Ол да буоллар, күрэхтэһээччилэр улахан, сыылба массыынаны хайдах курдук имигэстик салайалларын көрдөрдүлэр.

«Быйыл ПДМ машинистарын күрэхтэһиилэрэ олус интэриэһинэй буоллулар. Быйыл эбии киллэрбит сорудахтарбытыгар кыттааччылар гидравликаны бигээн билэллэрин, хомуоһу кытары үлэлиир маастарыстыбаларын, ону таһынан болҕомтолоохторун уонна куттал суох буолуутун быраабылаларын тутуһалларын көрдөрдүлэр Судьуйалар хамыыһыйаларын эмиэ дьоһуннаах үлэ күүппүтэ: биһиги мөккүөрдээх түгэннэр тахсыбаттарын туһугар сорудахтары сыыппараҕа түһэрэ сатаатыбыт. Холобур, икки сорудах төһө өр барар бириэмэтэ учуоттаныллыахтааҕа», -– диэн «ПДМ машиниһа» компетенцияҕа сүрүн судьуйа Владимир Тюменцев кэпсээтэ.

Идэҕэ бастыҥ

«Идэҕэ бастыҥ» чемпионат хампаанньаҕа оробуочай идэлэри сырдатарга, тарҕатарга, хампаанньа сүрүн үлэһиттэрин быһаарарга уонна үлэ көдьүүһүн үрдэтэргэ хайысхаламмыт саҥа көҕүлээһиннэри киллэрэргэ көмөлөһөр.
«Быйыл чемпионат Арассыыйаттан кыттааччылары эмиэ түмтэ, кинилэр бэйэлэрин дьыалаларыгар бастыҥ буолалларын судьуйаларга уонна көрөөччүлэргэ көрдөрдүлэр. Кыайыылаахтары эҕэрдэлиибин уонна кыттааччыларга барыларыгар махтанабын: эһиги маастарыстыбаҕыт таһымын өссө төгүл көрдөрдүгүт. Эһиги маастарыстыбаҕыт биир идэлээхтэргит ытыктабылларын уонна сөҕүүлэрин-махтайыыларын ыларын сэргэ, үүнэр көлүөнэни -– бэйэтин талаанын олоххо туһаныан уонна биһиги хампаанньабытын кытары тэҥҥэ сайдыан баҕалаахтары көҕүлүүр. Ону таһынан көрөөччүлэргэ уонна ыалдьааччыларга, ордук күрэхтэһиилэргэ бырактыычаскай көрүҥнэригэр ыалдьааччыларга, махтанабын. Мин «Чемпионат күннүгүн» тиһигин быспакка көрдүм: фан-сектор түмсүүлээҕэ уонна өйөбүлэ сомоҕолоһуу, доҕордоһуу уонна үтүө күрэх эйгэтин үөскэттэ», -– диэн АЛРОСА генеральнай дириэктэрэ Павел Маринычев күрэхтэһиилэр сабыллыыларыгар эттэ.

Чемпионат кыайыылаахтара

«Улахан кыамталаах самосвал суоппара» компетенция кыайыылааҕа — ТУРБИН Роман Александрович, Айхаллааҕы ХБК, II миэстэ – Карпенко Андрей Игоревич, Айхаллааҕы ХБК, III миэстэ – Гарипов Олег Фаритович, Удачнайдааҕы ХБК.
«Грохотовщик» компетенция кыайыылааҕа – ЛАТЫПОВ Антон Рашитович, Айхаллааҕы ХБК, II миэстэ – Бабушкин Антон Сергеевич, «Севералмаз» АУо, III миэстэ – Гуров Александр Геннадьевич, Айхаллааҕы ХБК.
«АЛРОСА эрэлэ» аат – Бискаев Алексей Витальевич, Удачнайдааҕы ХБК.

«ПДМ машиниһа» компетенция кыайыылааҕа – БАДРТДИНОВ Ильмир Ильшатович, Айхаллааҕы ХБК, II миэстэ – Иващенко Евгений Владимирович, Удачнайдааҕы ХБК, III миэстэ – Бакаев Константин Евгеньевич, Мииринэй-Ньурба ХБК.
«АЛРОСА киэн туттуута» аат – Яковлев Александр Юрьевич, Айхаллааҕы ХБК.
«ВЛЭП электромонтера» компетенция кыайыылааҕа – ИВАНОВ Александр Иванович, Мииринэй-Ньурба ХБК, II миэстэ – Арапов Роберт Зиннэтович, Айхаллааҕы ХБК, III миэстэ – Семенов Владимир Владимирович, Мииринэй-Ньурба ХБК.
«Сыбаарка технологиялара» компетенция кыайыылааҕа – МАХНЕВ Дмитрий Сергеевич, «Айхалтрансгаз» ХЭО, II миэстэ – Иванов Владимир Владимирович, «Анаабыр алмаастара» АУо, II миэстэ – Нутчин Борис Бронеславович, «Анаабыр алмаастара» АУо.
«АЛРОСА киэн туттуута» аат – Пиняев Евгений Викторович, УКС «Алмазтехмонтаж» СТ.
«АЛРОСА эрэлэ» – Бондарчук Юлия Дмитриевна, Удачнайдааҕы ХБК.
«ТС суоппара» компетенция кыайыылааҕа – ПОЖИДАЕВ Владислав Владимирович, «Алмаздортранс» ХЭО, II миэстэ — Быков Алексей Владимирович, «Алмаздортранс» ХЭО, III миэстэ — Суляев Сергей Николаевич, Мииринэйдээҕи авиа-тэрилтэ.
«Алмаастаах бородууксуйаны наардааччы» – ОСИПОВА Наталья Владимировна, «АЛРОСА АХ» ЯПТА салаата, II миэстэ – Марышова Елизавета Александровна, «Биир кэлим батарар тэрилтэтэ» салаата, III миэстэ – Максудов Исмоил Хусанжонович, Алмааһы наардыыр киин.
«Тэрили өрөмүөннээһин уонна хааччыйыы силиэсэрэ» компетенция кыайыылааҕа — МОРОТЧЕНКО Дмитрий Владимирович, Мииринэй-Ньурба ХБК, II миэстэ – Данжеев Анатолий Баирович, Мииринэй-Ньурба ХБК, III миэстэ – Дзанаев Арсен Константинович, Айхаллааҕы ХБК.
«АЛРОСА киэн туттуута» аат – Гурдяев Иван Васильевич, УМТС Айхаллааҕы-Удачнайдааҕы отделениета.
«АЛРОСА эрэлэ» аат – Варганов Александр Алексеевич, Айхаллааҕы ХБК.
«Экскаватор машиниһа» компетенция кыайыылааҕа – ГОРБЕНКО Дмитрий Олегович, Айхаллааҕы ХБК, II миэстэ – Долидзе Владимир Сергеевич, «Севералмаз» АУо, III миэстэ – Егоров Василий Анатольевич, «Анаабыр алмаастара» АУо.

Андрей ШИЛОВ суруйуутуттан тылбаас