Иитээччи искибиэрэ аһылынна

Сэтинньи 17 күнүгэр Дьокуускайга саҥа искибиэр  баар буолла. 203-с түөлбэҕэ Иитээччи искибиэрин  арыйдылар. Мантан чугас Дьокуускайдааҕы педагогическай кэллиэс, Педагогическай институт уонна Үөрэҕирии сайдыытын института бааллар. Ону тэҥэ, бу түөлбэҕэ икки оскуола, 5-6 уһуйаан баар буолан, эдэр ыаллар олохсуйаллар.

Манна иитээччи уонна үс оҕо скульптуралара боруонсаттан кутуллан, турдулар. Ону тэҥэ, «Оҕо кута» диэн харысхаллаах холуонна турда. Бу харысхалга кэлин оҕо кутун иҥэриниэн баҕалаах ыаллар кэлэн, баҕа санааларын этэр сирдэрэ буолуон сөп эбит.

Скульптура ааптара — РФ үтүөлээх скульптора Афанасий Романов. Искибиэри оҥоруу идиэйэтин бу түөлбэҕэ баар «Сардаана» уһуйаан сэбиэдиссэйэ Марианна Иванова былырыын киллэрбит эбит.

Искибиэри үөрүүлээхтик арыйыы сиэригэр-туомугар Ил Түмэн наукаҕа, үөрэҕириигэ бастайааннай кэмитиэтин бэрэссэдээтэлэ Антонина Григорьева, Дьокуускай куорат дьаһалтатын үөрэххэ управлениетын начаалынньыга Мария Петрова, үөрэх министиэристибэтин эбии үөрэхтээһиҥҥэ, иитиигэ, уопсай үөрэхтээһиҥҥэ судаарыстыбаннай бэлиитикэ департаменын сүрүн исписэлииһэ Туйаара Васильева, уо.д.а. кыттыыны ыллылар.

Бу искибиэр түөлбэ тутуллуоҕуттан, 2019 сылтан баар эрээри, үчүгэйдик оҥоһуллубакка, көрүллүбэккэ турбута. Мас олордубуттара эрээри, уу кутар тэрилтэ анамматах буолан, кумах буорга хатан хаалбыттара. Былырыын сибэкки олордубуттара, уу кутар буолбуттара. Иитээччи искибиэригэр аны болҕомто ууруллан, күөх мастары, сиэдэрэй сибэккилэри үүннэрэн, куорат олохтоохторо сөбүлээн сылдьар, сынньанар сирдэригэр кубулуйуо диэн эрэнэбит.