Икки улуус тыатын хаһаайыстыбатын үлэһиттэригэр анаан сэминээр ыытылынна

Бэҕэһээ, тохсунньу 22 күнүгэр, Мэҥэ Хаҥалас улууһун Төҥүлү нэһилиэгэр Саха Өрөспүүбүлүкэтин тыатын хаһаайыстыбатын уонна аска-үөлгэ бэлиитикэтин министиэристибэтэ Мэҥэ Хаҥалас, Уус Алдан улуустарын олохтоох бэйэни салайыныы бэрэстэбиитэллэригэр, тыа хаһаайыстыбатын салалталарыгар, оҥорон таһаарар кэпэрэтииптэригэр сэминээр ыытта.

Мэҥэ Хаҥалас улууһун тыатын хаһаайыстыбатын салалтатын салайааччыта Иннокентий Семенов, солбуйааччы Александр Борисов, тустаах исписэлиистэр уонна хаһаайыстыбалар кыттыыны ыллылар диэн Мэҥэ Хаҥалас улууһун дьаһалтатын пресс-сулууспата иһитиннэрэр.

Сэминээргэ тыа хаһаайыстыбатын салаатыгар киирэр уларыйыылар, тыа хаһаайыстыбата оҥорон таһаарар эйгэтин, «Электроннай бүддьүөт» федеральнай тиһиккэ көһүү тула кэпсэттилэр.

Мунньахха киирии тылы нэһилиэк баһылыга Петр Эверстов эттэ. СӨ тыатын хаһаайыстыбатын миниистирин бастакы солбуйааччы Анна Стручкова ситиһиилээх үлэни баҕарда. Агро-бырамыысыланнас киин өҥө оҥорор салаатын сүрүн экэнэмииһэ Майя Гуляева, цифровой сайдыы уонна техническэй хааччыйыы салаатын сүрүн системнай администратора Михаил Люй-Ден, СӨ тыатын хаһаайыстыбатын уонна аска-үөлгэ бэлиитикэтин министиэристибэтин стратегическай былааннааһын уонна экэниэмикэ департаменын салайааччыта Инна Оконешникова мунньах хаамыытынан дириҥ ис хоһоонноох иһитиннэриилэри оҥордулар.

Түмүккэ мунньах хаамыытынан киирбит этиилэри, санаалары ырытыы кэнниттэн кэлэр кэмнээҕи үлэ торума оҥоһулунна.