Ил Дархан Айсен Николаев «ОКТО» хампаанньа салайааччытын кытта көрүстэ

Бүгүн, ахсынньы 10 күнүгэр, Ил Дархан Айсен Николаев «ОКТО» хампаанньа дириэктэрдэрин сэбиэтин бэрэссэдээтэлигэр Алексей Толоконниковка ааспыт сайын Өймөкөөн улууһа халаан уутуттан эмсэҕэлээбитигэр биир бастакынан «ОКТО» кыһыл көмүһү хостуур хампаанньа көмөлөспүтүгэр махталын биллэрдэ. Бу туһунан Айсен Николаев МАХ ханаалыгар суруйда.

— Сыл түмүктэрин уонна кэлэр сылларга былааннары ырыттыбыт. Ол курдук, өрөспүүбүлүкэ сиригэр-уотугар баар хампаанньа тэрилтэлэрин сайдыыларын, саҥардыыга былааннары, геологоразведкаҕа уонна Өймөкөөн оройуонугар саҥа оҥорон таһаарар кыахтары ыытыы туһунан кэпсэттибит. Каадырдары бэлэмнээһиҥҥэ уонна үөрэхтээһиҥҥэ болҕомтобутун уурдубут. Хампаанньа геологияҕа уонна хайа дьыалатыгар профильнай үөрэх бырагыраамаларыгар, анал кылаастар аһыллыыларыгар, итиэннэ Уус-Ньара бөһүөлэгэр үөрэх тэрилтэтэ тутулларыгар инвестициялыырга бэлэмин туһунан эттэ. Бырамыысыланнаска туһуламмыт урбаан оройуон олоҕор кыттыһара — дьоҥҥо уонна сиргэ-уокка эппиэтинэстээх сыһыан үтүө холобурунан буолар.