Ил Дархан Айсен Николаев Василий Егоровы кытта көрүстэ

Ил Дархан Айсен Николаев Арассыыйаҕа успуорт үтүөлээх маастарын Василий Егоровы кытта көрүстэ. Василий Егоров спортивнай карьератын 2024 сылынан түмүктээтэ.

Ил Дархан спорду сөбүлээн, сэҥээрэн көрөөччүлэргэ Василий ситиһиилээх киирсиилэринэн, кыайыыларынан үөрүүнү бэлэхтээбитин, өрөспүүбүлүкэ уонна дойду чиэһин үрдүк таһымнаах турнирдарга чиэстээхтик көмүскээбитин бэлиэтээтэ.

—-13 сыл устатыгар кини Арассыыйа буоксаҕа сүүмэрдэммит хамаандатыгар киирэн Сахатын сирин чиэстээхтик көмүскээтэ. Төһөлөөх умнуллубат, долгутуулаах түгэннэри, чаҕылхай киирсиилэри бу сыллар усталарыгар Василий бэлэхтээбитэ буолуой!  Барыта баара — кыайыы үөрүүтэ, өрөгөйө, кыайтарыы хомолтото. Ол гынан баран биһиги, кини биир дойдулаахтара, чулуу спортсмеммытынан киэн туттабыт, — диэтэ Айсен Николаев.

Эрэгийиэн салайааччыта инникитин даҕаны Василий сыалын-соругун толорон тэйэр дьулуурдааҕынан бэйэтин саҕалааһыннарыгар ситиһиилэнэригэр эрэнэрин биллэрдэ.

Василий Егоров Ил Дархаҥҥа инники былааннарын кэпсээтэ. Ааттаах-суоллаах спортсмен Айсен Николаевка өрөспүүбүлүкэҕэ успуорду сайыннарыыны өйүүрүгэр, элбэх сыл устатыгар киниэхэ куруук көмө-тирэх, өйөбүл буолбутугар махтанна.

Спортсмен Саха сиригэр успуорду, физкултуураны дьон биһириирин, сэргиирин, сэҥээрэрин, дьарыктанар дьон ахсаана элбээн иһэрин эттэ. Маныаха кини ыччаты, эдэр спортсменнары кытары үөрүйэҕин, сатабылын үллэстэргэ бэлэмин биллэрдэ.

Санатан эттэххэ, Василий Егоров ахсынньы 14 күнүгэр Дьокуускайга ыытыллыбыт «Хотугу ыҥырыы» профессиональнай буоксаҕа күрэхтэһиигэ Филиппиныттан кэлбит спортсмены эрэллээхтик кыайбыта уонна рингэҕэ тахсыытын түмүктээбитэ.

Василий Егоров Арассыйа сүүмэрдэммит хамаандатын сүрүн састаабыгар 13 сылтан ордук кэмҥэ сырытта. Кини РФ успуордун үтүөлээх маастара, Арассыыйа биэс төгүллээх чөмпүйүөнэ, национальнай чөмпүйэнээт түөрт төгүллээх үрүҥ көмүс призера, Европа икки төгүллээх чөмпүйүөнэ, аан дойду чөмпүйэнээтин үрүҥ көмүс призера, Рио-де-Жанейроҕа ыытыллыбыт Олимпийскай оонньуулар кыттыылаахтара.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, СИА