Ил Дархан Астанаҕа Аҕа дойдуну көмүскээччилэр монуменнарыгар сибэкки дьөрбөтүн уурда

Бүгүн, муус устар 19 күнүгэр, Ил Дархан Айсен Николаев уонна СӨ бырабыыталыстыбатын чилиэннэрэ Астана куоракка Аҕа дойдуну көмүскээччилэр монуменнарыгар сибэкки дьөрбөтүн уурдулар.

Бу тэрээһиҥҥэ Астана куорат Алматы оройуонун акима Саматулы Максат кыттыыны ылла. Кини СӨ аҕа баһылыгар монумент уонна Аҕа дойду улуу сэриитигэр хорсуннук кыттыбыт казах буойуннарын туһунан кэпсээтэ.

37,5 миэтэрэ үрдүктээх монумент «Отан коргаушылар» диэн болуоссакка баар. Аҕа дойду сэриитин сылларыгар 1,3 мөл. тахса казах сэриигэ барбытыттан, аҥаардара сэрии толоонугар охтубут. 500-тэн тахса казах Сэбиэскэй Сойуус Дьоруойа үрдүк аатын сүкпүтэ.

101 колостан турар стела Казахстааҥҥа олорор араас омук доҕордоһуутун туоһулуур. Стела ортотугар көмүс чааскылаах дьахтар турар — бу Ийэ дойду уобараһа.