Ил Дархан бүгүн Аллараа Халыма улууһугар үлэлиир

Ил Дархан Айсен Николаев бүгүн оробуочай сырыынан Аллараа Халыма  улууһугар  тиийдэ.  Кини  оройуоҥҥа  үлэтин баһылык  Ярослав Бандеровы кытта үлэ көрсүһүүттэн саҕалаата.

— Ярослав Алексеевич оройуоҥҥа олоххо киирэр социальнай-экономическай быһыы-майгы уонна сүрүн бырайыактар тустарынан кэпсээтэ. Ититии сезонугар  бэлэмнэнии уонна бөһүөлэктэри эрэллээхтик энергиянан хааччыйыы үлэтэ былаан быһыытынан барар, бу хотугу тыйыс усулуобуйаҕа тыын суолталаах. Соторутааҕыта Черскэйгэ   саҥа мобильнай автоматизациялаах энергокомплекс (МАЭК) үлэҕэ киирэн, 2,6 тыһыынча нэһилиэнньэлээх бөһүөлээх  эрэллээхтик  электроэнергиянан хааччыллыаҕа.

Баһылыгы кытта көрсүһүүгэ нэһилиэнньэлээх пууннарга социальнай объектары тутууну кэпсэттибит.  Ол иһигэр Колымскайга  оскуола-саад тутуутун. Өссө биир улахан боппуруоһунан  Колымскай  сэлиэнньэтигэр элбэх кыбартыыралаах дьиэни тутуу буолла. Ол курдук тохсунньуга дьон олорор дьиэтэ умайбыта, — диэн Ил Дархан ТГ ханаалыгар суруйда.

Маны таһынан көрсүһүүгэ анал байыаннай  дьайыы кыттыылаахтарын өйүүр боппуруостарын тула кэпсэттилэр. Ярослав Алексеевич байыаннай дьайыы бэтэрээнэ быһыытьнан, байыастары уонна кинилэр дьиэ кэргэттэрин өйөөһүҥҥэ улахан болҕомтотун уурар.