Ил Дархан Казахстаан Бэрэсидьиэнин кытта көрүстэ

Ил Дархан Айсен Николаев Казахстаан Өрөспүүбүлүкэтин Бэрэсидьиэнэ Касым-Жомарт Токаевы кытта көрүстэ. Муус устар 18 күнүгэр Казахстааҥҥа буолбут көрсүһүүгэ өрүттэр салгыы бииргэ үлэлээһин кэскиллээх хайысхаларын дьүүллэстилэр.

Казахстаан Бэрэсидьиэнэ икки өрөспүүбүлүкэлэр икки ардыларыгар үгүс өрүттээх сибээстэр сайдыбытын бэлиэтээтэ. Манна чаҕылхай туоһутунан хардарыта атыы- эргиэн кээмэйин улаатыннарыыта буолар.

«Биһиги бииргэ үлэлээһиннэр кэскиллээҕин олус интэриэһиргээн көрөбүт. Биһиги саха норуотугар саамай сылаас сыһыаннаахпыт. Эһиги дьыалабыай уонна ускуустуба бэрэстэбиитэллэрин састаабыгар улахан дэлэгээссийэ арыаллыырын бэлиэтиэхпин баҕарабын», — диэн Казахстаан лидерэ бэлиэтээтэ.

Токаев Казахстааҥҥа Саха сирин күннэрин, ол чэрчитинэн култуурнай уонна успуорт тэрээһиннэри ыытыыны, ону тэҥэ Саха сирин инвестиционнай уонна туристическай кыахтарын билиһиннэрии былааннаммытынан эҕэрдэлээтэ.

Бэйэтин өттүттэн Айсен Николаев Касым-Жомарт Токаевка  махтанна уонна Саха Өрөспүүбүлүкэтин уонна Казахстаан Өрөспүүбүлүкэтин икки ардыларыгар бииргэ үлэлээһин хамсааһына балачча улааппытын бэлиэтээтэ. Кини Казахстаан норуотугар өйөбүл тылларын эттэ уонна халаан түмүгэр тахсыбыт бары ыарахаттары суһаллык туоруурга баҕарда.

«Ааспыт көрсүһүүттэн Саха сирин уонна Казахстаан икки ардыларыгар сыһыаны сайыннарыыга улахан үлэ ыытылынна. Атыы-эргиэн кээмэйэ икки төгүл улаатта  — 160 мөлүйүөн долларга тиийдэ. Атыы-эргиэн, информационнай технологиялар, креативнай индустриялар, ону тэҥэ үөрэх, култуура, успуорт уонна туризм эйгэлэригэр бииргэ үлэлээһин биллэр-көстөр көдьүүстээх түмүктэри кэтээн көрөбүт.Биһиги бырааттыы сибээстэрбитин бөҕөргөтөр уонна кэҥэтэр саҥа кыахтар иннигэр турабыт диэн эрэнэбин», — диэн көрсүһүү түмүктэрин туһунан Айсен Николаев кэпсээтэ.

Санатан эттэххэ, Саха сирин күннэрэ Казахстааҥҥа ааспыт 2023 сыл тохсунньутугар буолбут Токаевы кытары көрсүһүүгэ быһаарыллыбыта. Бу күннэргэ, муус устар 18-23 күннэригэр Казахстаан олохтоохторугар анаан Астанаҕа уонна Алматыга улахан култуурунай бырагыраама ыытыллар.

СӨ Ил Дарханын уонна Бырабыыталыстыбатын пресс-сулууспата