Ил Дархан кутурҕанын биллэрдэ

Ил Дархан Айсен Николаев социальнай ситим нөҥүө Красногорскай куоратыгар «Крокус Сити Холл» комплекска буолбут быһылаанынан сибээстээн дириҥ кутурҕанын биллэрдэ.
«Биһиги дойдубутун бүтүннүүтүн «Крокус Сити Холл» комплекска терроризм түмүгэр хас да буруйа суох дьон өлбүтэ, сүүһүнэн киһи эмсэҕэлээбитэ соһутта. Саха сирин элбэх омуктаах норуотун  уонна тус бэйэм ааппыттан аймахтарын, чугас дьоннорун сүтэрбиттэргэ дириҥ кутурҕаммын тиэрдэбин.  Эмсэҕэлээбиттэргэ түргэнник доруобуйаларын чөлүгэр түһэрэллэригэр баҕарабын. Буруйдаахтар бары булуллуохтара уонна саамай кытаанах буруйу-сэмэни ылыахтара диэн эрэнэбин.

Кутурҕан күнүнэн сибээстээн, Саха сиригэр үрдүнэн маассабай-аралдьытар тэрээһиннэр тохтотуллаллар. Бу ирдэбили бары өйдүүргүтүгэр көрдөһөбүн», — диэн Айсен Николаев социальнай ситим нөҥүө суруйар.