Ил Дархан судаарыстыбаннай наҕараадалары туттарда

Ил Дархан Айсен Николаев бүгүн, ахсынньы 20 күнүгэр, саҥа сылы көрсө Арассыыйа Федерациятын уонна Саха Өрөспүүбүлүкэтин судаарыстыбаннай наҕараадаларын туттарда.

Кини эҕэрдэлииригэр Саха сиригэр 2023  — Үлэ сыла ааһан эрэрин, маныаха өрөспүүбүлүкэ хас биирдии олохтооҕо бэйэтин үлэтинэн төрөөбүт дойдутун ситиһиитин үксэтиспитин бэлиэтээтэ.

«Хас биирдиигит дойдугут туһугар бэриниилээхтик сулууспалыыгыт! Эһигинэн Саха сирэ бүттүүн киэн туттар. Эһиги уопсастыбабытын бөҕөргөтөҕүт, атыттарга холобур буолаҕыт. Билигин, бу тосту уларыйыылаах кэмҥэ, эһиги бэйэҕит дьыалаҕытыгар үтүө суобастаах сыһыаҥҥыт, хорсун быһыыгыт хаһааҥҥытааҕар да наада. Ахсынньы 14  күнүгэр РФ Бэрэсидьиэнэ Владимир Путин элбэх национальностаах Арассыыйа норуотун модун күүһүн, ыҥырыыга бүттүүн түмсүү сүдү суолтатын бэлиэтээбитэ. Онуоха эһиги Ийэ дойдуга бэриниигитинэн, оҥорор дьыалаҕытынан ону бигэргэтэҕит«, — диэн наҕараадаланааччыларга туһаайан Ил Дархан Айсен Николаев эттэ.

Үөрүүлээх быһыыга-майгыга Арассыыйа Федерациятын уонна Саха Өрөспүүбүлүкэтин 46 наҕараадатын туттарда.

СӨ үрдүкү наҕараадатынан — «Хотугу сулус» уордьанынан наҕараадаламмыт Бочуот уордьанын кавалера, РФ уонна СӨ үтүөлээх юриһа, РФ Борокуратууратын бочуоттаах үлэһитэ, М.К.Аммосов аатынан СӨ Судаарыстыбаннай бириэмийэтин лауреата Василий Колмогоров харда тыл эттэ. Кини үлэһит дьон сыратын үрдүктүк сыаналаабыттарыгар үрдүкү салалтаҕа махтанна.

«Арассыыйа судаарыстыбатын бары былааннара олоххо киирэллэрин, норуоппут салгыы чэчирии сайдарын туһугар Саха сирин олохтоохторун өссө күүскэ сомоҕолоһоргутугар ыҥырабын. Байыастарга этэҥҥэ буолууну, доруобуйаны, дьиэҕитигэр кыайыы көтөллөөх хайаан да эргиллэргитигэр баҕарабын«, — диэтэ Василий Колмогоров.

Долгутуулаах тэрээһиҥҥэ II истиэпэннээх «Хорсунун иһин» мэтээлинэн «Боотур» добровольческай этэрээт «Барс-2» батальонун аҕыс байыаһа наҕараадаланна.

РФ Бэрэсидьиэнин Бочуотунай Грамотатынан «СӨ ОДьКХ» тэрилтэ кылаабынай инженерин солбуйааччы Владимир Бондарь, РФ Бэрэсидьиэнин Махтал суругунан — СӨ Ил Дарханын уонна Бырабыыталыстыбатын дьыалаларын управлениетын салайар Иван Лазарев наҕараадаланнылар.

СӨ тыа хаһаайыстыбатын үтүөлээх үлэһитэ, өрөспүүбүлүкэтээҕи астыыр технология киинин салайар Розаида Гудуева С.М.Аржаков аатынан Судаарыстыбаннай бириэмийэнэн наҕараадаланна.

СӨ Ил Дарханын уонна Бырабыыталыстыбатын пресс-сулууспатыттан  тылбаас

Хаартыскаларга Андрей Сорокин түһэриилэрэ, СИА