Ил Дархан Тиксии маастар-былаанын кэмигэр оҥорон түмүктүүргэ сорудахтаата

Айсен Николаев ахсынньы 11 күнүгэр СӨ бырабыыталыстыбатын уонна баһылык дьаһалтатын салалталарын кытары мунньаҕы ыытта.

Ил Дархан бэлиэтээн эппитинэн, Арассыыйа бырабыыталыстыбата экэниэмикэ уонна инфраструктура бырайыактарын олоххо киллэрэргэ Арктика зонатын тирэх нэһилиэнньэлээх пууннарын испииһэгин бигэргэттэ.
«Дойду бэрэсидьиэнэ Владимир Путин сорудаҕынан, биһиги Арассыыйаҕа Арктика зоната суһал социальнай-экэнэмиичэскэй сайдыытын хааччыйарга үлэни салгыы ыытабыт. Бу сирдэр-уоттар стратегическай дьаһаллары олоххо киллэрэргэ базанан буолуохтара», – диэн эрэгийиэн баһылыга эттэ.
Испииһэккэ Арктика зонатыгар сыһыаннаах Арассыыйа 9 эрэгийиэнигэр сытар 16 агломерация киллэрилиннэ.
«Тирэх пууннарга чуолаан Булуҥ улууһун Тиксии бөһүөлэгэ киллэрилиннэ. Владимир Путин Уһук Илиҥҥи эрэгийиэннэри сайыннарыы туһунан мунньах түмүгүнэн бырабыыталыстыбаҕа кэккэ сорудахтары, ол иһигэр социальнай-экэнэмиичэскэй сайдыы уһун кэмнээх былааннарын, Арктика тирэх нэһилиэнньэлээх пууннарыгар маастар-былааннары бэлэмнээһини  биэрдэ. Өрөспүүбүлүкэ бырабыыталыстыбата маастар-былааны кэмигэр бүтэрэргитигэр көрдөһөбүн. Тиксии норуот хаһаайыстыбатыгар, дойдуга национальнай куттал суох буолуутун хааччыйарга улахан суолталаныаҕа», – диэн Айсен Николаев тоһоҕолоон бэлиэтээтэ.
Мунньахха ону сэргэ федеральнай уонна өрөспүүбүлүкэтээҕи бырагыраамалар чэрчилэринэн Дьокуускай куоракка, Чурапчы уонна Хонуу сэлиэнньэлэригэр социальнай эбийиэктэри тутуу үлэтин хаамыытын, Саха сирин бөдөҥ тэрилтэлэрин үп-хаһаайыстыбаннай үлэлэрин былаанын толорууга оҥоруохтаах отчуоттарын, байыаннай эпэрээссийэ кыттыылаахтарын уонна кинилэр дьиэ кэргэттэрин өйөөһүн боппуруостарын көрдүлэр.

СӨ Ил Дарханын, бырабыыталыстыбатын пресс-сулууспата