Ил Түмэн иккис уочараттаах пленарнай мунньаҕа саҕаланна

Бүгүн, алтынньы 4 күнүгэр, сэттис ыҥырыылаах Ил Түмэн уочараттаах иккис мунньаҕа үлэтин саҕалаата.

Пленарнай мунньах сарсыарда 10 чаастан дойду уонна өрөспүүбүлүкэ өрөгөйүн ырыатынан аһылынна.

Бастакынан спикер Алексей Еремеев ааспыт мунньахха ылбатах норуот дьокутааттарыгар Гаврил Алексеевка уонна Виктор Лебедевка дастабырыанньаларын туттарда.

Алексей Еремеев бүгүн норуот дьокутааттара иккис уочараттаах мунньахха барыта 20 боппуруос көрүллүө диэтэ уонна кистэлэҥ куоластааһыҥҥа киирэр боппуруостары быһаарда.

Бастакы боппуруоһунан СӨ сэттис ыҥырыылаах Ил Түмэнин биир кэм төрүккэ үлэлиир секретариатын бигэргэттилэр. Секретариат састаабыгар Игорь Григорьев, Эдгар Константинов, Иван Луцкан, Сергей Сивцев киирдилэр.