Йошкар-Ола. Саха тыйаатырын гостуруоллара дохсун ытыс тыаһынан доҕуһуолланнылар

Икки күн устата Шкетан аатынан национальнай тыйаатыр саалата толору көрөөччүнү муста. Марий Эл олохтоохторо уонна ыалдьыттара Саха тыйаатырын испэктээктэрин кытары аан бастаан билистилэр.

Кинилэр саха режиссердарын туруоруулара уратытын, артыыстар оонньуулара итэҕэтиилээҕин тоһоҕолоон бэлиэтээтилэр. Итиэннэ көстүүмнэр испэктээккэ оонньуурга, уобараһы арыйарга улаханнык көмөлөһөллөрүн эттилэр.
Йошкар-Ола куоракка гостуруолу Сергей Потапов «Маастар уонна Маргарита» испэктээгэ түмүктээтэ. Михаил Булгаков аан дойдуга биллэр айымньытын сахалыы туруоруу көрөөччүлэри соһутта, сөхтөрдө.
Хас биирдии көрдөрүү дохсун ытыс тыаһынан доҕуһуолланна.
Икки күн устата тыйаатыр фойетыгар турбут Саха тыйаатырын быыстапката көрөөччү болҕомтотун тарта.
Б.Ойуунускай аатынан Саха тыйаатырын труппата Йошкар-Олаҕа ситиһиилээхтик испэктээктэрин көрдөрөн, салгыы Чебоксары куоракка айаҥҥа турунна.
Саха тыйаатырын сонуннарын көтүтүмэҥ.

Тыйаатыр пресс-сулууспата