Кадеттар оскуолаларын саҥа куорпуһа аһылынна

Билии күнүгэр Дьокуускайдааҕы кадеттар  оскуола-интэринээттэрин саҥа үөрэнэр куорпуһа үөрүүлээх быһыыга-майгыга аһылынна.

Бу бэлиэ түгэнинэн Ил Дархан Айсен Николаев үөрэнээччилэри уонна учууталлары эҕэрдэлээтэ.

—Номнуо үйэ чиэппэрин кэриҥэ Дьокуускайдааҕы  кадетскай оскуола уолаттары дьиҥнээх эр киһи, Аҕа дойдуну көмүскээччилэр  буола улааталларыгар иитэн-үөрэтэн таһаарар.   Бүгүн оскуола устуоруйатыгар саҥа түһүмэх саҕаланна. 4,5 тыһ. кв. м. үөрэх кыһатын саҥа дьиэтигэр  кадеттар үөрэнэллэригэр туох усулуобуйа барыта тэриллибит, — диэн Ил Дархан телеграмҥа ханаалыгар суруйда.