Казахстаан өрөспүүбүлүкэтин национальнай архыыбар «Легендарный Максим» быыстапка аһылынна

Казахстаан Астана куоратыгар Саха сирин күннэрин чэрчитинэн  судаарыстыбаннай, уопсастыбаннай диэйэтэл, Саха АССР төрүттэспит чулуу киһи Максим Кирович Аммосов олоҕор уонна үлэтигэр анаммыт «Легендарный Максим» быыстапка аһылынна.

Экспозицияҕа 1897- 1938 сыллары хабар Хотугу-Казахстаан уобалаһын судаарыстыбаннай архыыбын пуондатыттан  ылыллыбыт докумуоннар, хаартыскалар киирбиттэр.  Олор истэригэр Максим Аммосов  ЦК ВКП(б) сэкиритээригэр Иосиф Сталиҥҥа, доруобуйа харыстабылын  наркомугар Григорий Каминскайга о.д.а. устуоруйа суолталаах суруктар, Максим Аммосов киэҥ  далааһыннаах олоҕун сырдатар үлэлэр бааллар.

Тэрийээччилэр этэллэринэн, Максим Кирович Аммосов курдук чаҕылхай киһи олоҕун эрэ кытта билсии буолбакка, Казахстаан уонна Саха сирэ доҕордуу сыһыаннарын туоһулуур  быыстапка буолар.

1932-1937 сс М.К. Аммосов Казахстаан үс уобалаһын партиятын обкомун бастакы сэкиритээринэн үлэлээбитэ. Максим Аммосов Хотугу-Казахстаан уобалаһын бастакы салайааччыта, эрэгийиэн социальнай-экэнэмиичэскэй сайдыытыгар бастакы олугу уурбута.