Кэбээйигэ икки баан каартатын уорбут олохтоох дьахтар тутулунна

Кэбээйи улууһун полицията икки баан каартатын уорууга уорбаланааччыны быһаарда. Буруйу оҥорууга 39 саастаах олохтоох дьахтар уорбаланар.

ИДьМ сулууспатын Кэбээйи улууһун отделын холуобунай ирдэбил үлэһиттэрэ ыыппыт суһал-көрдүүр тэрээһиннэрин түмүгэр, баан каарталарын уорууга уорбаланааччыны быһаардылар.  39 саастаах олохтоох дьахтар буолара билиннэ.

Силиэстийэ быһаарбытынан, дьахтар олорор киһитин кытта урукку кэргэнин дьиэтигэр ыалдьыттыы сылдьан арыгы испиттэр. Дьиэ хаһаайына утуйбутун кэннэ, дьахтар урукку эрин уонна быраатын  баан каарталарын булан уоран баран, дьиэттэн тахсан барбыт. Кэлин, буруйу оҥорбут дьахтар уоруллубут каарталарынан олохтоох маҕаһыыннарга төлөһөн, уопсайа 12 000 солкуобайы ороскуоттаабыт. Билигин уорбаланааччыга РФ Холуобунай кодексатын 158-с ыстатыйатын 3-с чааһынан («Уоруу») холуобунай дьыалалар тэрилиннэ, диэн ИДьМ  пресс-сулууспата суруйар.