Кэрээниттэн тахсыбыт тыатааҕы

Күөх сайын кэлэн турдаҕына, бултаан-балыктаан аһаабакка тыатааҕы оҕонньор нэһилиэнньэлээх пууннары буулуур идэлэннэ.

Бөлүүн аны Айхал бөһүөлэгэр кэлэн “ыалдьыттаабыт”. Саатар таһынан эрэ сылдьыбатах, түннүгү алдьатан дьиэҕэ киирбит.

“Алмазный край” иһитиннэрбитинэн, ол кэмҥэ дьиэ иһигэр утуйа сыппыт дьахтар икки оҕотун кытта нэһиилэ куотан тахсыбыттар. Чугастааҕы ыаллара тыаһаан-ууһаан үргүтэ сатаабыттар. Дьиэ иһигэр хаалбыт үһүс оҕону хата тыыппатах, төттөрү тахсыбытын ыттар кыйдаабыттар.

Айхал бөһүөлэгин дьаһалтата Таежнай, Попугаево уулуссалар олохтоохторун сэрэхтээх сылдьалларыгар, оҕону таһырдьа таһаарбаттарыгар, дьону ити диэки күүлэйдээбэттэригэр ыҥырар. Бөһүөлэк чугаһын бэркэ сирийэн көрө-истэ, хонтуруолга тута сылдьаллар.