Киһи киһинэн олорор, үтүө санаа күүс эбэр

Биһиги, элбэх оҕолоох дьиэ кэргэн, Анна Анатольевна, Иван Гаврильевич Степановтар дьоҥҥо –сэргэҕэ үтүө холобур буоллун диэн үөрүүбүтүн үллэстэбит.

2022 сыл балаҕан ыйын 21 күнүгэр Бүлүү куоратыгар олордохпутуна, биһиги дьиэ кэргэҥҥэ олус соһуччу анал байыаннай дьайыыга ыҥырыы кэлэн, кэргэним, үс кырачааттар амарах аҕалара, дьиэ кэргэн дурда-хахха, көмүскүүр тутаах киһибит ыҥырыллан барбыта. Мин үс оҕолоох эдэр ийэ кырачааннарбын кууспутанан соҕотох хаалбытым. Куорат сиргэ олорор ыараханын билэр буолан, дойдубутугар 1 Күүлэккэ көһөн кэлбиппит. Күн-түүн аҕабытын ахтарбыт күүһүрэн, оҕолоро суохтааннар, дойдубутугар дьонум—сэргэм көмөтүнэн бары бииргэ суулаһан, өйөнсөн олоробут. Аҕабыт иккитэ сынньалаҥ ылан кэлэн барбыта, ол кэмнэр биһиги дьиэ кэргэҥҥэ саамай үөрүүлээх түгэннэрбит. Хас күн аайы сибээскэ тахсарын күүтэбит, кэпсэттэҕинэ биһиги саҕа дьолломмут дьон суохтар.

Мин төрөппүттэрбин кытта бииргэ олоробут. Тыа сирин усулуобуйатыгар ыарахаттары көрсөммүт, быйыл кулун тутар ыйга “Күүлэт” ПК бэрэссэдээтэлигэр Тутукарова Елена Петровнаҕа көрдөһүү сурук суруйбутум, “благоустройства киллэртэрэргэ эбии хос туттарга тутуу маһынан көмөлөһүөххүт дуо”- диэн.

Ол көрдөһүүбүтүн быһа гыммакка, тутатына сөбүлэһэн биһиги дьиэ кэргэҥҥэ улахан көмөнү оҥордо. Ол курдук ыҥыран ылан “Маскытын киллэртэрдим, пилорамалатан барытын тэлгэһэҕитигэр тиэйтэриэм” диэн бу икки сыл тухары истибитэх үчүгэй сонуну этэн, ыарахан балаһыанньабын умуннаран дьол кыымын бэлэхтээтилэр. Маспытын бэлэмнэспит «Күүлэт” ПК коллективыгар, хара үлэттэн чаҕыйбат чэрдээх илиилээх хоһуун тырахтарыыс үлэһиттэригэр махтал бастыҥын тириэдэбит. Биһиги аҕабыт кыайыы—хотуу кынаттанан кэлэригэр Елена Петровна өҥөтө, үтүө тыла күүс –көмө буолуоҕа диэн эрэнэбит.

Үөрүүбүттэн тылбынан сатаан эппэтэх тылларбын сурук нөҥүө махтанарга сананным. Бу уустук кэмҥэ киһиэхэ кыра да өйөбүл наада, бу анал дьайыы хаһан бүтэрэ биллибэт, ол эрэн кэргэммин, аҕабытын Иван Гаврильевиһы эрэнэ күүтэбит.

Елена Петровна сатабыллаах салайааччы буоларын элбэх дьон-сэргэ билэр, кини салайааччы эрэ быһыытынан буолбакка , истиҥ санаалаах ийэ , тапталлаах кэргэн. Биһиги дьиэ кэргэн ыктарбыт кэммитигэр улахан көмөнү оҥорбутуттан сүһүөхтээх бэйэм сүгүрүйэн, долгуйан туран эдэркээн ийэ уонна чоҕулуспут харахтаах үс хотой уолаттарым, ыраах Украина сиригэр сылдьар байыас аҕабыт Уйбаан аатыттан муҥура суох махталбытын тиэрдэбит.

Эһиги үтүөҕүтүн хаһан да умнуохпут суоҕа, “Киһи киһинэн олорор” диэн өс хоһооно үйэлэргэ сүппэтин. Тыа хаһаайыстыбата үүнэ-сайда , үрүҥ аһы дэлэтэ, үлэни кыайан-хотон бастыҥнартан бастыҥнара буола туруҥ диэн алгыс тылбытын аныыбыт.

Тус олоххутугар, дьиэ кэргэҥҥитигэр куруук үөрүү эрэ баар буоллун, чэгиэн туругу, үлэҕитигэр өссө үрдүк ситиһиилэри.

Махталы кытта Степановтар дьиэ кэргэттэрэ.

Олохсуола.рф саайтан.