Киһини быһаҕынан анньыыга уорбаланааччыны туттулар

Олунньу 3 күнүн киэһэтигэр ИДьМ 1-кы нүөмэрдээх полиция салаатын дьуһуурунай чааһыгар, Звезднай түөлбэ биир дьиэтигэр быһаҕынан анньыллыбыт эр киһи сытарын туһунан иһитиннэрии киирбит.  

Быһылаан буолбут сиригэр кэлбит патрульнай-постовой сулууспа үлэһиттэрэ эрдэ сууттана сылдьыбыт, олохтоох 54 саастаах киһини тутан полиция салаатыгар илдьибиттэр.

Барыллаан быһаарыынан, бииргэ арыгы испит уорбаланааччы уонна 44 саастаах хаста даҕаны сууттана сылдьыбыт кини билэр киһитин икки ардыгар иирсээн тахсыбыт. Иирсээн кэмигэр эмискэ кыбартыыра хаһаайына абааһы көрөн билэр киһитин түөһүн туһаайыытынан быһаҕынан аспыт. Ол кэнниттэн уорбаланааччы сүгэни ылбыт уонна подъезка куоппут эмсэҕэлээччини батыһан тахсан, полиция үлэһиттэригэр тутуллубут.

Быһылаан тахсыбыт сириттэн полиция үлэһиттэрэ сүгэни, куукунаҕа туттуллар быһаҕы ылбыттар.

Эмсэҕэлээччини суһал көмө биригээдэтэ кэлэн балыыһаҕа киллэрбит эрээри, бүгүн тыына быстыбыт. Полиция үлэһиттэрэ хомуйбут матырыйаалларын силиэстийэ уорганыгар тиксэрбиттэр, онон процессуальнай быһаарыы ылыныллыбыт. Бу туһунан СӨ ИДьМ пресс-сулууспата иһитиннэрэр.