Киин куоракка доруобуйаларынан хааччахтаах дьоҥҥо аналлаах социальнай бырайыактары билиһиннэрдилэр

Дьокуускайга Инбэлииттэр дэкээдэлэригэр анаммыт «Обнимаю сердцем. Возможности» бэстибээл чэрчитинэн кэммиэрчэскэйэ суох тэрилтэлэр социальнай бырайыактарын көрдөрүүтэ буолла.

Тэрээһиҥҥэ КСТ  бэрэстэбиитэллэрэ, педагогтар, психологтар уонна доруобуйаларынан хааччахтаах дьону кытта үлэлиир исписэлиистэр кытыннылар. Көрсүһүү сыала — уопуту атастаһыы, бииргэ үлэлээһин саҥа көрүҥнэрин көрдөөһүн уонна номнуо туһалаах түмүктэри аҕалар социальнай көҕүлээһиннэри сайыннарыы.

Бырайыактары билиһиннэриигэ Стратегическай көҕүлээһиннэр ааҕыныстыбыларын КСТ секторын сайыннарар дивизионун дириэктэрэ Владимир Вайнер кытынна. Тэрилтэлэр доруобуйаларынан хааччахтаах оҕолору уонна улахан дьону өйүүр эйгэҕэ бастыҥ холобурдарын билиһиннэрдилэр. Ол иһигэр — инклюзивнай үөрэхтээһин бырагыраамалара, идэҕэ үөрэтэр, үлэнэн хааччыйар уонна сүбэ-ама буолар бырайыактар, доруобуйаларынан хааччахтаммыт байыаннай дьайыы бэтэрээннэрин олоххо төнүннэрии. Ону таһынан, режиссер Никита Давыдов бырайыага — «Дьол сэттэ күнэ» диэн инклюзивнай киинэ көрдөрүлүннэ. Элбэх көҕүлээһин номнуо үтүө түмүктэри көрдөрдө уонна дойду үрдүнэн киэҥник тарҕатыыга бэлэм. Владимир Вайнер хас биирдии этиини болҕойон иһиттэ. Кини атын эрэгийиэннэр уопуттарын кэпсээтэ.

«Мин санаабар, олус күүстээх, ымпыгар-чымпыгар тиийэ толкуйдаммыт бырайыактар. Бу бырайыактар үксүлэрэ номнуо олоххо киирэн эрэллэрэ кэрэхсэбиллээх. Ордук үөрдэрэ диэн, үгүстэрэ Үлэ министиэристибэтин кытта бииргэ үлэлииллэр уонна номнуо социальнай өҥөлөрү оҥорооччу статустаахтар. Бырайыактар бэйэ-бэйэлэрин күүһүрдүөхтэрин, түмсүөхтэрин сөптөөҕө улахан суолталаах. Маннык тэрээһиннэр инновациялар хайдах үөскүүллэрин көрдөрөллөр, ордук судаарыстыба өттүттэн өйөбүл баар буоллаҕына — бу үлэни ордук көдьүүстээх оҥорор», – диэтэ Владимир Вайнер.

«Обнимаю сердцем. Возможности» бэстибээл аһаҕас кэпсэтии былаһааккатынан буолла уонна кыттааччылары салгыы бииргэ үлэлэһэргэ кынаттаата, доруобуйаларынан хааччахтаах дьоҥҥо өйөбүл өссө систиэмэлээх уонна көдьүүстээх буоларын туһугар.